Dili – Hahú hosi tuur hein nia aman hakerek notísia, inspira feto ne’ebé moris iha Munisípiu Ainaro ho naran istimada Alou, harii mídia online Orluli News hodi sai ponte ba feto no labarik-feto sira atu hato’o opiniaun iha aspetu igualdade jéneru no dezenvolvimentu integradu.
Nia mak Clementina Fátima da Costa Araújo (Alou), moris iha 21 Marsu 1990, ne’ebé funda mídia Orluli News iha 2021, oras ne’e daudaun kontinua hela estudu iha Universidade da Paz no foti kursu Dezenvolvimentu Politika, maske estuda iha area politika Alou iha paisaun ba area media, ho motivasaun no konsidera nia pai hanesan lalenok, mosu ideia brillante ba Alou hodi funda Mídia Oline Orluli News.
Plan Inter. TL servisu hamutuk ho Media Orluli hodi fasilita treinamentu PSHEA ba jornalista no joventude sira
“Ha’u gosta sai jornalista tanba inspiradór mai hosi ha’u-nia pai, momentu ne’ebá nia hanesan jornalista iha RTTL, bainhira nia hakerek notísia ha’u gosta akompaña, no koñese hakerek notísia no halo reportajen hosi ha’u nia Pai,” Alou haktuir ba Ekipa Formandu sira Training iha FMDC via telefone iha Sesta (21/07).
Alou konta kona-ba harii mídia Lian Orluli atu sai lian ba feto sira iha Munisípiu Ainaro hodi hato’o sira-nia hanoin atu empodera feto no joven feto sira iha área rurál atu sai poténsia no la-inferiór ba mane sira.
“Orluli News mak mídia online ne’ebé hari’i hosi grupu feto foinsa’e sira iha tinan 2021, ha’u mak hanesan Fundadora, Orluli News ne’e atu sai hanesan lian ba feto sira iha Munisípiu Ainaro,” tenik nia.
Oras ne’e iha Orluli News emprega funsionáriu no voluntáriu hamutuk na’in sia (9), ne’ebé kompostu hosi feto hitu no mane rua.
Alou fundamenta, funsionáriu voluntáriu hamutuk na’in 9 ne’ebé durante fó dedikasaun ba motór funsionamentu Orluli News, dadaun ne’e seidauk hetan vensimentu maibé Orluli News frekuentemente simu de’it fee ba transporte no osan pulsa.
Sara Maria Fátima, nudar funsionáriu ida haktuir katak nia sente konfortável ho ambiente servisu iha Orluli News ne’ebé fó mahon ba nia hodi hato’o informasaun ba feto maluk sira iha área rurál liu hosi publikasaun oioin ne’ebé publika iha Lia Orluli.
“Ambiente servisu iha mídia Lian Orluli halo ha’u konfortabel, tanba hanesan mahon ba ami no kapasita ami joven sira, aprende kona-ba servisu mídia nian hodi publika informasaun ne’ebé kredível no loos ba feto sira iha Munisípiu Ainaro,” Sara hatete.
Alou ho nia ekipa halo hela kobertura
Nune’e mos, Norvia Amélia Ramos, nudar voluntáriu ida iha Orluli News, konfesa katak maski enfrenta difikuldade durante hala’o knaar, sira la sai hanesan barreira ne’ebé impede sira-nia karreira hodi alkansa susesu iha sira-nia servisu.
“Ami la’o tuir natureza iha Mídia Orluli tuir ambiente ne’ebé iha, talvez ami hasoru difikuldade, maibé ami sempre kompleta malu hodi taka frakeza ne’ebé ami iha,” Norvia haktuir.
Iha sorin seluk, Diretora Fundasaun Nafofila, Maria Madalena da Silva Barros, konsidera ezisténsia Mídia Orluli News iha Ainaro hanesan pasu importante atu promove feto sira hodi empodera an ba servisu no bele hatutan feto sira-nia lian liuhosi publikasaun notísia kona-ba feto no labarik-feto sira. Diretora Nafofila ne’e mós informa hosi nia knaar fatin iha Ainaro katak Mídia Orluli News mós fó espasu ba joven feto sira atu aprende jornalizmu.
“Agora dadaun ami nia voluntáriu feto ida mós ba aprende iha Lian Orluli atu hatene kona-ba jornalista, nia fila mai iha ne’e bele uza ami nia kamera sira iha ne’e, hodi foto, no hakerek kona-ba ami nia atividade depois bele publika,” Diretora Fundasaun Nafofila ne’e dehan.
Alou hatete katak Mídia Orluli News sei nafatin defende feto sira no sai lian ba feto sira iha área rurál, partikulármente iha Munisípiu Ainaro.
Alou hameno atu feto maluk sira iha nafatin iha vontade hodi aprende no labele moe husu buat ne’ebé la-hatene.
Nia mós enkoraja feto maluk sira ne’ebé kualifika ona atu partisipa iha dezenvolvimentu nasionál no munisipal, tanba sira iha ona buat barak atu kontribui.
Reportajen: Ekipa Formandus Training GSR-4, Grupo 8
Discussion about this post