CI-ABC.ID Realiza Journalism Fundamentals Training ba Jornalista Ativu Sira

Oecusse – 15/08/23-Conselho Impresa Timor-Leste (CITL) no Australia Broadcast Cooperation, Internasional Development (ABC.ID) hamutuk realiza treinamento Fundamental Jornalismo ba jornalista sira nebe loroloron halo kobertura Iha kampu, hodi enkoraja jornalista sira sai kritiku atu kria sira nia agenda setting rasik kona ba problema fundamental sira nebe komunidade hasoru tuir prinsípiu jornalismo nian.

Tuir Diretór Diresaun Dezenvolvimentu no Análize Mídia CI, Alberico da C. Junior, iha ninia liafuan abertura katak programa treinamento ida realiza tanba CI no ABC.ID halo ona akordu hodi servisu hamutuk, no programa treinamento hirak ne’e mos tama ona Iha Planu Asaun CI nian ba tinan 2022-2026, no ba oin sei kontinua halo matadalan ba reportagem inkluzivu.

“CI no ABC.ID servisu hamutuk ho objetivu halao treinamento ida ne’e mak atu hametin kompetensia teknika no professional jornalista nian no hamoris servisu redasaun nian iha ida idak nia média, no husu ba Ita bot sira atu aproveita oportunidade ida ne’e no uza teoria sira iha prátika”

Iha fatin hanesan representante ABC.ID iha Timor-Leste Michael Coggan hanesan jornalista profesional nebe durante tinan 30 servisu iha televizaun no rádio ABC.ID, nia enkoraja tebes jornalista sira atu ativu iha treinamento ida ne’e.

^{Representante ABC.ID iha Timor-Leste Michael Coggan no Tradutor Salvador de Jesus hato’o hela Lian Makloke}
“Hau enkoraja jornalista sira atu husu pergunta ho fleksibel tanba iha ne’e fatin nebe seguru hodi hetan buat foun ruma”

Jornalista Radio Komunidade Jacinta da Costa informa treinamento jornalismo fundamental hanesan dahuluk nebe mak bele tulun nia halo kobertura iha komunidade nia let.

^{Jacinta da Costa Jornalista Radio Komunidade}

“Treinamento ida ne’e primeira vez ba hau no ajuda hau bele aprende hamutuk ho jornalista husi media oioin no ajuda hau fila fali ba rádio komunidade halo kobertura loroloron ho hanoin krítiku no informasaun klean”

Enkuantu treinamento ida ne’e iha formador husi ABC.ID, Michael Coggan no Caroline Winter, no mos tradutor Salvador de Jesus, treinador seluk husi CI Alberico da C. Junior, halao durante loron 3 Iha salaun Dominicana Oecusse, hahu ohin loron 14 to loron 16 Fulan Agustus, partisipa husi jornalista hamutuk nain 24 husi media online, imprime no mos media elektronika televizaun no jornalista ativu husi rádio komunidade sira.

Jornalista: Eva Flor