ROSS MERRY “KIOS MATENEK NU’UDAR ESPASU SOSIÁL BA APRENDE INOVASAUN NO NEGÓSIU”

Dili – Kioske barak mak mosu iha lidun Dili laran. Maibé kioske ida-ne’e la’ós hanesan kioske baibain. Ross Merry da Glória ho nia kolega sira harii ‘Kios Matenek’ iha 2020 hodi fó espasu sosiál ba joven no labarik sira hodi halo diskusaun kona-ba edukasaun, kuidadu ambientál, inovasaun, no negósiu.
“Objetivu hosi inisiativa harii Kios Matenek (https://www.facebook.com/kiosmatenek) ne’e sai hanesan espasu sosiál ida hodi fó oportunidade ba komunidade sira no juventude sira ne’ebé iha talentu oioin hodi halo diskusaun kona-ba edukasaun, ambiente no atividade interasante sira seluk tanba Kios Matenek sai hanesan fatin ida ne’ebé fó espasu sosiál ba juventude sira nomós sai hanesan fatin ida ne’ebé hodi halo negósiu,” Ross Merry hateten.

Ross Merry ho nia kolega sira foto iha Kios Matenek nia oin
Ross Merry ho nia kolega sira fiar katak joven sira bele iha poténsia atu aprende no sai inovativu hodi kontribui di’ak liután ba dezenvolvimentu Timor-Leste.
“(Ita) hanaran Kios hanesan termu ida ne’ebé besik liu ba komunidade no idéntiku ho komunidade no Matenek signifika iha espasu sosiál pozitivu ida no mós bele sai hanesan fatin ne’ebé ema bele halo diskusaun no aprende kona-ba inovasaun foun no aprende hamutuk,” Ross Merry realsa.

Atividade sira ne’ebé Kios Matenek hala’o mak kapasitasaun ba foinsa’e sira iha área kuidadu ambientál, inklui atividade inovativa oioin kona-ba jestaun lixu, nune’e mós edukasaun iha língua Ingés no Portugés.
Foto: https://www.facebook.com/kiosmatenek
Aleinde ida-ne’e, Kios Matenek mós hanorin joven sira kona-ba aplikasaun sistema idropóniku iha kultivasaun modo no selseluk tan.
Tanba hanoin inovativa ne’e, Ross Merry ho ekipa hosi Kios Matenek partisipa iha kompetisaun Green Building Design Challenge ne’ebé mak PNUD (sigla Inglés, UNDP) organiza iha 2021. Felizmente, Kios Matenek sai vensedór iha kompetisaun ne’e hodi hetan fundu ba konstrusaun ba Kios Matenek ne’ebé finaliza ona iha Outubru 2021, maski hasoru dezafiu oioin hanesan inundasaun 4 Abríl 2021 no konfinamentu oioin tanba tranzmisaun COVID-19 iha Timor-Leste.
“Iha momentu ne’ebá ami-nia ekipa mak sai vensedór iha programa UNDP nian, no ida-ne’e oportunidade hodi hetan fundu inisiál nune’e bele harii Kios Matenek no to’o agora hamriik hanesan tipu ‘Uma Matak’ iha nasaun Timor-Leste,” Ross Merry relembra.

Antigu aluna Departamentu Relasaun Internasionál UNTL nian ne’e hameno ba feto foinsa’e sira la-bele lakon vontade atu aprende nafatin, tanba ohin-loron feto sira hetan oportunidade barak hodi kontribui ba futuru hodi dezenvolve di’ak liután ita-nia rai liuhusi kreatividade oioin.