Ministériu da Edukasaun Juventude no Desportu liuhusi Instututo Nasional de Formação de Docentes e Profisionais da Educação Timor-Leste (INFORDEPE) hamutuk ho Centro Nasional Chega (CNC) kontinua kapasita profesór husi ensinu báziku kona-ba oinsá hanourin lisaun istória ba estudante 1 no 2 siklu sira iha territóriu nasionál.
Diretór FormasaunoProfesional Longuinhos da Silva hateten, atividade formasaun ne’e, entre Instituisaun Ministériu da Educação no Centro Nacional Chega ho objetivu atu kumpri kurikulu nasionál edukasaun nian, tanba iha eskola balun hanorin kona-ba istória no dalaruma menus materia didatíka, tanba ne’e CNC produz livru lubuk ida hodi distribui ba eskola maibé antes atu distribui prefesores sira presiza liuhusi atividade formasaun atu nunee iha koñesimentu hodi transmite fali ba estudante sira.
“Objetivu prinsipál husi formasaun ne’e atu haklean ita-nia matenek no profesór sira-nia matenek koba-ba istória, nune’e profesór sira bele hanorin fali ba estudante sira iha eskola tuir istória ne’ebé mak mós, tebes ho loloos ba jerasaun foun sira, tanba ema balu hateten, se haú naín ba rai ida ne’e, haú nain ba istória ida nee, haú tenke hatene haú-nia istória rasik”, Diretór ne’e informa ba jornalista sira iha Salaun CNC Balide Dili ( 28/03/2023).
Diretór haktuir tan antes nee profesór atus ida resin mak hetan ona formasaun no agora daudaun fasilita tan formasaun ba profesór nain 50 no ba oin sei kontinua tan ba profesór seluk atu eduka estudante sira iha territóriu hotu tanba nia dehan profesór sira presiza hatene klean istória Timor nian hodi hatutan ba jerasaun foun sira
“Formasaun sei hala’o durante tolu (3) ne’e profesór sira aprende masímu liuhusi filmazen, Drama no Video balun inklui fahe mós livru ba profesór sira no formasaun ne’e seidauk sufisiénte ba profesór sira tanba loron tolu ne’e minímu tebes tanba profesór sira presiza hatene klean istória molok hanourin estudante sira, nune’e ba oin presiza formasaun kontinua ba profesór seluk hodi dezenvolve liután istória nian”, dehan nia.
Iha fatin hanesan Diretór Ezekutivu Centro Nasional Chega (CNC) Hugo Maria Fernandes hateten, formasaun ba profesór antes ne’e hahú ona iha tinan 2018 no agora formasaun kontinua ba profesor 50 iha tinan ne’e liga ba istória Timor-Leste nian liu husi livru didátiku sira.
“Atividade ida ne’e kontinuasaun ne’ebé lao ona iha tinan hirak liubá, hanesan 2018 ne’e halo peskiza rápida ida ba profesór sira iha territóriu laran tomak, nune’e identifika profesór barak sei menus materia ne’ebé uza hodi hanorin estudante sira, entaun ho ida ne’e mak ami hanoin parseira ho Ministériu Edukasaun no liu husi INFORDEPE koko atu introduz buat balu hodi tulun profesor sira”, Nia Haktuir tan.
Partisipasaun iha formasaun ne’e profesor sira hamutuk 50 ne’ebé iha nivél ensinu báziku no segundu siklu ne’ebé husi munisípiu 11, no formasaun sei hala’o durante loron tolu, antes nee fasitlita ona formasaun ba profesór 108, tuir planu ba futuru sei kontinua formasaun ba profesór rihun sanulu (10) resin tanba nu’udar edukador presiza hatene istória Timor nian.
Jornalista : Maria de Rosa
Editor : Jonas
Discussion about this post