Sosiadade fiar katak moris uma-laran nian sai responsabilidade ba mane deit, maibe faktus hatudu laos nune’e. Etelvina Maria Dias, sobrevivensia kazu violénsia domestika ida, prova ona kona-ba ida ne’e.
Hafoin sai husi uma mahon iha tinan 2005, ho abilidade husi treinamentu ne’ebe oferese husi FOKUPERS, Etelvina loke keós ida maibé la susesu. Nia muda hanoin atu loke bengkel maibe depois nia deside loke karpintaria (mebel).
Etelvina Maria Dias na’in ba Karpinteiru iha Alas. (Foto:Santhy/2.12.2022)
“Modal ne’e suporta mai husi Fokupers fó osan $ 400 dollar iha tinan 2021, la’os de’it loke mebel maibé hau mós sambil fa’an gazolina. Dadaun ne’e hau iha ona staff na’in rua, kada fulan hau selu sira USD$ 115.00 ba ema ida. Dehan Etelvina.
Etelvina, señora idade 46 ne’e iha oan nain 3. Nia husi Munisipiu Manufahi, Postu-Administrativu Alas, Suku Taituda, Aldeia Lore no agora dadaun hela iha nia rai moris-fatin. Nia hetan violénsia domestika husi nia kaben bainhira nia isin-rua.
Laos Etelvina deit, feto barak iha mundu mos hetan violensia bainhira sira hahu hetan bebe. Iha estudu multi-nasaun hala’o husi Organizasaun Saude Mundial (WHO), hatudu katak entre 13% no 52% feto sira iha mundu hetan abuzu husi sira nia parseiru intimu. Violensia ne’e akontese bainhira sira hahu isin-rua.
“Hau nia kaben, loron kalan baku hela de’it hau, to’o hau isin sira metan hotu. Hau devorsia ho hau nia kaben, depois hau mai hela iha uma mahon iha tinan 2004-2005. Mana sira husi FOKUPERS mak akompaña hau to’o hau hetan solusaun. Hau nia oan mós moris iha Uma Mahon. Mana sira husi Fokupers lori hau ba Hospital Nasional Guido Valadares (HNGV).” Etelvina esplika ho matan-been.
FOKUPERS nudar organizasaun ida ne’ebé eziste ona tinan 25 nia laran, habelar nia servisu inklui fó asisténsia ba vitima, halo edukasaun infansia sedu não violensia no igualdade jéneru, halo advokasia no hakbiit feto sira nia koñesimentu iha area negosiu.
Iha tinan 2021 FOKUPERS fó ona treinamentu ba feto sobrevivente husi munisipiu 13. Kuaze sobrevivente 150 mak hetan ona koiñesementu kona-ba saida mak violénsia no oinsa jere emosaun, hakbiit sira ho abilidade foun hodi dezenvolve mikro empregu, involve iha atividade suku no treinamentu seluk ne’ebe tulun sira moris iha sosiadade. Husi sira na’in 150 ne’e, na’in 27 mak konsege asesu ona ba iha small grant fundus ki’ik-oan, hodi halo sira nia negosiu. Negosiu ne’ebe sira halo mak fa’an produtu lokal, haki’ak animal, loke keos, tunu sate no seluk tan.
Vice-Diretór Dominga Amaral dehan FOKUPERS ninian asistensia fó bainhira sira mai hanesan vitima, maibé depois sira bele forte no rekopera husi trauma, transforma sira nia-an hanesan sobrevivente, no forte hodi foti desizaun hodi jere sira nia moris rasik no halao sira nia negosiu.
Hafoin Etelvina simu apoiu orsamentu husi FOKUPERS hamutuk USD$ 400,00 hodi hahu ninia negosiu karpintaria, oras ne’e dadauk negosiu ne’e lao ona ba susesu. Nia hetan ona lukru hamutuk USD$ 1,700. Nia fa’an kama no odamatan ida entre folin USD$ 50.00 to’o USD$ 60.00. Nia mos fó ona servisu ba ema nain-rua ho salariu USD$ 125.00 kada fulan.
Anino Gonçalves, idade 28, servisu ba Etelvina desde tinan 2021. Nia admira ho Etelvina nia esforsu. Maske moris pasadu hetan violénsia domestika no abandona husi nia-kaben, maibé Etelvina, feto ida ne’ebé forte.
“Hau hahú servisu iha tinan 2021 bainhira mana Etelvina loke karpintaria. Hau hetan salariu fulan ida $125. Hau kontenti banhira hetan servisu hanesan ne’e. Salariu mós sufisiente duni hodi haree hau nia familia.” tenik, Anino Gonçalves.
Etelvina halo susesu brillante. Nia kontenti tebes ho nia moris ida agora. Vise-Diretóra FOKUPERS Domingas Amaral mos afirma kona-ba susesu ne’ebe Etelvina halo.
“FOKUPERS apoiu fundu ba feto sobrevivente na’in 27 ne’e, kada ema ida hetan $ 450 to’o $ 500. Ba sobrevivente Etelvina foufoun hetan $400 dollar, maibé depois nia hetan rendimentu di’ak liu tan, konsege hetan lukru di’ak liu tan.” dehan Domingas Amaral.
Sosiadade sei labele halo tan feto sira sai vulneravel. Violensia ne’ebe sira hasoru, laos ikus ba sira nia moris. Ho tulun husi organizasaun lokál sira hanesan FOKUPERS, sira hamrik hodi hatudu oinsa sira halo balansu poder iha sosiadade. Sira responsabiliza ba moris uma laran nian no garante oan sira nia futuru.
Etelvina iha mehi atu fó futuru diak ba nia oan sira. Nia hakark nia oan sira bele remata estudu iha nivel universitaria. Iha tinan 2023 nia oan feto-boot ne’ebe remata ona estudu sekundaria sei kontinua ninia estudu.**
Discussion about this post