Radio, online – Familia saudozu Conis Santana, tuir planu sei halo komunikasaun diak ho komunidade Distritu Ermera atu lori hikas saudozo niniaa ruin hodi ba halot, iha ninia moris fatin, Suku Tutuala, Distritu Lautem, hodi halao serominia kultural.
Reprezentante familia saudozu ho naran kompletu Nino Conis Santana, Julio Coreia informa lia hirak ne’e ba jornalista hafoin hasoru malu ho Prezidenti da Republika (PR), Taur Matan Ruak Kuarta, (18/9).
Julio hateten, objetivu mai hasoru PR Taur ho asuntu rua. Primeru ejijensia husi saudozo Conis nia inan ne’ebe sei moris. Laos ejije ba PR Taur, laos ejije ba governu maibe ejije ba familia para mai hato’o ba Prezidenti da Republika oinsa ita atu hanoin ruin ne’ebe mak ate agora sei iha Mertutu, Ermera.
Segundo asuntu mak, tuir uzu kustume tradisaun, tamba parte Tutuala nunak husik ninia kultura, ne’ebe ninia ema atu mate iha neebe deit, tenke lori ba lori ba ninia moris fatin.
“Ami sei foti fatuk, ai ou rai ne’ebe mak reprezenta saudozu Conis hodi fila ba ami nia uma lulik, asuntu rua ne’e mak ami hato’o ba Prezidenti da Republika, hanesan amigu iha rede guerileirus,”dehan Julio.
Julio hatutan, “Conis hanesan ami nia maun, ami nia alin no ami nia tiun. Maibe enjeralmente ba Timor tomak ne’e, ba ita nia lider nasional ida, ita nia Restaurasaun 20 de Maio tama ba 10 anos. Ami hare katak iha fatin balun, ita hare katak, ita nia lideransa sira balun agora halot sira nia ruin ona, so infelismente ita nia saudozo ne’e mak seidauk,”.
Tuir Julio hare ba razaun hirak ne’e mak familia mai to’o iha palacio Prezidenti oinsa buka dalan ida para familia halot saudozu Conis tuir lisan kultura, suku Tutuala nian.
“Ami sente orgulhu, ita nia PR Taur, ninia resposta mos diak, depois nia fo tempo ba ami atu ami tur hamutuk koalia didiak, tamba saudozu ninia rate iha Mertutu neba hela, halo oisa mak bele kordena ho parte Mertutu neba para aban bai rua la bele akontese tan buat ida entre Ermera ho Tutuala, tamba adat Ermera mos iha, Tutuala mos iha. Kuandu kuak se mak taka ida ne’e mak buat todan ba ita, tuir kultura,”dehan PR Taur hatutan husi Julio.
“Ami familia entre Tuturala ho Mertutu sempre kontaktu, maibe ofisialmente ami seidauk ba, tamba ami sei husu ita nia Prezidenti da Republika no ita nia governu tamba saudozu mate tamba luta ba rai ida ne’e ninia independensia. Ami lao halo nonok deit, maibe ita nia nai ulun sira tenke hatene buat ne’e,”dehan Julio hodi remata.
Discussion about this post