Radio, online – Sesta feira liuba (7/9), Komisáriu Komisaun Anti-Korrupsaun (KAK), Adérito de Jesus Soares ho Komandante Jeral Polísia Nasional Timor-Leste (PNTL) Longuinhos Monteiro asina akordu kooperasaun ida hodi formaliza servisus kombate korrupsaun iha Timor-Leste.
Informasaun ne’e radioliberdade.com asesu liuu husi via emai husi Gabinete KAK, foin lalais ne’e.
Akordu kooperasaun ne’ebe asina iha edifisiu KAK, Farol, Dili kobre apoiu servisu investigasaun nian, uza fasilidades, halo formasaun hamutuk no seluk tan entre instituisaun estadu rua ne’e ba asuntu kombate krími korrupsaun iha Timor Leste.
Komisáriu Adérito de Jesus iha nian intervensaun sublinha katak akordu kooperasaun entre KAK-PNTL ne’e hanesan pasu importante ida iha prosesu dezenvolvimentu instituisaun KAK ne’ebe sei foun, hodi nune, servisu kombate korrupsaun iha Timor-Leste hetan kooperasaun no diak liu tan ho instituisaun seluk.
Iha akordu ne’e PNTL sei ofrese tulun balu ba apoia servisus investigasaun kriminal relasiona ho kázus korrupsaun, loke espasu ba KAK hodi uza fasilidades PNTL nian balu no formasaun konjunta entre KAK no PNTL. Materia formasaun nian sei determina hamutuk bazeia ba nesesidades no rekursus ne’ebe iha.
Iha oportunidade ne’e, Komandante Jeral PNTL Longuinhos Monteiro lori komando jeral PNTL nian naran hato’o apresiasaun máximu ba inisiativa KAK hodi hahu halo diskusaun kona-ba kooperasaun servisus ida ne’e, no ikus mai bele realiza duni akordu kooperasaun entre instituisoens estadu rua ne’e.
Komunikadu ne’e dehan, Komisairu PNTL Longuinhos Monteiro iha nia diskursu badak hatete, PNTL sei desponibiliza i depozita PNTL nian rekursu tomak kualker fatin no tempu no sei kolabora diak ho instituisaun KAK para servisu hodi luta hasoru kompleksidade aktus krimi korrupsaun ohin loron nian hanesan krimi finanseira no ekonómiku, atu bele efektivu liu tan.
Longuinhos hatudu komprimisu atu implementa akordu ne’e hahu ohin loron kedas hodi aloka entidades PNTL balu ba KAK hodi fo apoiu ba investigadores KAK nian ne’ebe halo servisu investigasaun kazuz krími korrupsaun hodi alkansa objektivu kombate krími korrupsaun iha rai ida ne’e.
Iha tempu besik mai, instituisaun rua ne’e diside sei halo diskusaun liu tan kona-ba detalhas oinsa atu implementa akordu ne’e ho didiak.
KAK ho PNTL servisu hamutuk kleur ona desde KAK harii iha 2010. Nudar polisia espesializada, tuir lei, KAK ho PNTL nia natureza funsaun hanesan deit maski KAK konsentra aan ba deit kazus korrupsaun.
Estrutura organizasaun entre sira na’in rua mak lahanesan. Ne’e signifika katak KAK la’os deit halo investigasaun ba kazus krimi korrupsaun, maibe KAK mos bele halo kapturasaun ba suspeitus sira iha fatin wainhira kaer ho matan.
Discussion about this post