Radio, online – Ministru Justisa, Dionisio Soares Babo baku ninia feen, Luisa Morais iha edifisu Ministeriu Justisa nian, horseik (5/9) maizu menus oras 12:45 liu. Husi agresaun Ministru Justisa ne’e, tenki obriga ninia feen tama iha sala Urjensia, Hospital Nasional Guido Valadares (HNGV).
Ministru Dionisio ninia eskolto tenke lori Luisa ba Hospital Nasionál Guido Valadares (HNGV) tamba dezmaia hafoin hetan baku, vitima ninia kolega, Agusta Amaral hateten.
Momentu ne’e hau iha ne’ebá, Luisa tama ba ho sira nia oan ki’ik ne’e atu hasoru nia laen hodi koalia, maibe derepente Dionisio nia eskoltu lori sai vitima ho kondisaun dezmaia, dehan nia.
“Ha’u iha tempu ne’ebá akompaina hela Mana Luisa, maibe ha’u liur deit. Depois la kleur tan sira haksesu malu no ha’u senti karik iha problema ona,” Agusta esplika.
Luisa ninia kolega ne’e mós haktuir katak, bainhira baku vitima Dionisio mós sai mai liur hodi haksesuk malu ho nia kona-ba kazu baku ne’e.
Iha sorin seluk, Antonio Aitahan Matak ne’ebé mós marka prezensa iha sala urjensia HNGV ne’e hateten, ne’e sala boot tamba nu’udar ministru justisa nia tenke buka dalan pasifiku hodi rezolve kazu ne’e laos uza fali violensia.
Aitahan Matan esplika, kazu agresaun fiziku ne’e kategoriza hanesan kazu krimi tamba ne’e tenke rezolve tuir dalan legal.
“Ne’e sala boot no ne’e tama ona ba iha kazu krimi no tenke rezolve liu husi dalan justisa nia,” nia heteten.
Tuir informasaun husi familia vitima katak, Luisa ba atu hasoru ninia laen tamba kuaze besik fulan barak ona nia abandona hela nia feen ho oan ho razaun la klaru.
To’o notisias ne’e hatutn, Radioliberdadedili.com tenta halo konfirmasaun kazu ne’e husi Ministru Justisa, liu husi meus oioin maibe la hetan.
Discussion about this post