Radio, online – Deputadu husi Bankada CNRT, Vicente Guterres hanesan kandidatu uniku liu husi votasaun sai hanesan Prezidenti Parlamentu Nasional (PN) iha III lejislatura ba periodu 2012-2017.
Liu husi votasaun segredu ne’e ho votus avavor 40, kontra 3, abstensaun 7, nulu 2 no branku 13.
Iha eleisaun parlamentar foin iha dia 7 de Jullu, partido CNRT hetan kadeira 30 sai hanesan partido manan maioria simples.
Prezidenti PN III Lejislatura ne’e hodi troka Fernando La Sama de Araujo husi Partido Demokratiku (PD).
Hafoin eleitu ba jornalista, Prezidenti PN Vicente Guterres hateten, vizaun ne’ebe PN iha uluk kedan maka tenki ezerse didiak funsaun no kumpri kompetensia. Hanesan halo lei no fiskalizasaun ba programa govenu ninian.
“Ami politiku maka tenki buka hadia ami nian an, hodi bele merese hetan konfiansa husi povu,”Vicente komenta.
Vicente hatutan, PN tenki iha relasionamentu institusional ho governu, Prezidenti Republika, Tribunais no sosiedade sivil sira hotu mak ejisti iha nasaun ne’e. Importante mak PN tenki iha relasaun diak ho PN husi nasaun CPLP, Parlamentu ASEAN, Uniaun entre parlamentar, Parlamentu Australia no pasifiku nian.
Iha 2001, Vicente Guterres hakat ba PN sai hanesan asembleia konstitaunte hodi halo lei inan, liu husi Partido Demokrata Cristao (PDC).
Discussion about this post