Radio, online – Sosiedade sivil iha ba area justisa, Justice System Monitoring Programme (JSMP) ezije ba estadu Estadu Timor-Leste no Indonézia hodi implementa relatoriu Komisaun Verdade Amizade (KVA).
Informasaun ne’e radioliberdadedili online simu liu husi via email JSMP Tersa, (31/7). JSMP hatutan, iha loron 11 fulan Agostu 2005, TL-Indonezia asina akordu ida hodi estabelese Komisaun Verdade no Amizade (KVA) ho ninia mandatu atu resolve kazu krime violasaun direitus umanus ne’ebé komete husi militár Indonézia no mílisia pro Indonézia iha tempu antes no depoisde referendu iha tinan 1999.
Depoisde Estadu rua estabelse Komisaun ne’e, Estadu rua komesa servisu hamutuk hahú husi fulan Agostu 2005-Maiu 2008. Antes Komisaun termina sira nia mandatu, komisaun refere husik hela rekomendasaun lubuk ida ba Estadu Timor-Leste no Indonézia.
Diretór interinu JSMP Casimiro dos Santos lamenta katak “tinan haat liu ona hahú husi 15 Jullu 2008-15 Jullu 2012, Estadu Timor Leste no Indonézia lansa relatóriu final kona-bá Komisaun Verdade no Amizade, maibé to’o ohin loron Estadu rua ne’e haluha no ignora tiha rekomendasaun sira ne’ebé sira rasik aprova”.
“Ami sente implentasaun relatóriu Komisaun Verdade no Amizade importante tanbá ho implementasaun relatóriu ne’e sei rekupera sofrementu vítima sira ne’ebé sofre durante tempu okupasan. Aliende ne’e mos ho implementasaun relatóriu ne’e sei la repete fila-fali violasaun direítus umanus iha futuru” dehan Casimiro dos Santos.
Proseu legál ba autór kriminozu sira tenki nafatin iha, tanbá liuhusi prosesu legál mak bele hakotu impunidade tantu iha Timor-Leste nomós iha Indonézia.
JSMP ejize ba Estadu Timor-Leste no Estadu Indonézia atu imediatamente aselara prosesu implementasaun relatóriu Komisaun Verdade no Amizade liu-liu ba asuntu ema lakon.
JSMP mós ejize Estadu Timor-Leste no Indonézia atu bele nafatin aselera prosesu legál hasoru autór violasaun direitus umanus, inklui fó reparasaun ba família vítima ne’ebé hetan violasaun durante okupasaun indonézia iha Timor-Leste.
Discussion about this post