Radio, online – Prezidenti da Republika (PR), Taur Matan ruak kontinua husu ba povu Timor Leste (TL) tomak no politiku sira hotu atu nafatin kontribui paz no estabilidade, tamba risku bo’ot instabilidade maka afeta nasaun kontinua kiat no mukit ba beibeik.
Xefi estadu, Taur Matan Ruak hateten asuntu ne’e ba jornalista sira, hafoin partisipa reuniaun CPLP iha Maputo, Mocambique, Segunda (23/7) iha Aeroportu Internasional Nicolau Lobatu Comoro, Dili relasiona ho aktu violensia ne’ebe mosu espontania iha semana kotuk, iha kapital Dili no mos Distritu.
“Ita tenki kondena mai hosi se deit ho objetivo saida deit, ita nia povu presiza hakmatek, merese ita nia respeitu, ita hotu nia domina tamba risku bo’ot ne’ebe afeta ita nia nasaun maka kiak, mukit, se ita hare ba foho la’o lemo oitoan iha ita nia rain ita here ke ita nia populasaun nia vida aat liu fali ita ne’ebe moris iha Dili,” deklara Taur Matan Ruak.
Relasiona aktu violensia ne’ebe mosu iha semana kotuk daudaun ne’e Prezidente Republika Taur Matan Ruak, enkoraza politiku sira hotu, Lider hotu no sidadaun hotu – hotu atu tenki kria paz no estabilidade hala’o dezemvolvimentu iha rai ida ne’e no responde preokupasoens no nesesidade ne’ebe povu presiza.
“Hadia sira nia moris, oan sira ba eskola, saude diak, estrada diak, tantu buat ne’ebe sira presiza no hakarak,” Haklaken Xefi estadu ne’e.
Taur Matan Ruak haktuir katak, bazea rezultadu husi eleisaun parlamentar semana hirak liu ba ne’e la’os partidu mak manan, tamba ne’e presiza hotu – hotu foliman ba malu hodi lori rai Timor ba oin diak liu tan.
Nia kontinua husu ba entidade tomak atu foti dignidade nasaun no povu ninian hodi hatudu ba mundu katak Timor Leste (TL), mos hatene saida mak atu halo no saida mak hakarak.
“Husu ba povu tomak koopera nafatin maka’as liu tan para que foti dignidade ita nia nasaun nian, ita nia povu nian hodi hatudu ba mundu katak ita hatene saida mak ita hakarak no halo oinsa atu ba to’o iha ne’eba,” subliña PR Taur Matan Ruak.
PR Taur Sei dauk simu kontaktu formasaun Governu
Iha oportuniadade ne’e PR Taur hateten to’o oras ne’e sei dauk simu kontaktu husi partidu sira ne’ebe avansa iha eleisaun parlamentar hodi forma V Governu Konstituisional.
“Hau hein hela, hau sei hatene posibilidade formasaun Governu ne’e oinsa,” informa Xefi Estadu Xefi estadu ne’e dehan, tuir konstituisaun prezidente da Republika tuir nia mandatu fo passu ba Primeiru Ministru ne’ebe partidu maioritariu hatudu ou koligasaun partidu hotu – hotu para prezidente fo posse ida ne’e depois de kontaktu partidu hotu – hotu ne’ebe iha asentu parlamentar.
Tamban ne’e Prezidente Taur Matan Ruak hein hela kontaktu hosi partidu ne’ebe hetan votus atu forma Governu no liu hosi halo aliansa ho partidu sira seluk.
“Hau hein no haree oinsa mak akontese aban, bainrua, baintolu, semana ida ne’e nia laran ate formasaun Governu, V Governu konstituisional,”dehan PR Taur.
Discussion about this post