Radio, online – Governu halo autorizasaun hili militante foun atu kontrola situasaun rai laran, liliu kapital Dili. “Ohin kedas hau haruka Polisia Militar (PM) ho missaun ida ne’ebe lolos no momos. Wainhira hasoru ema ho fatuk lalika uza kilat hasoru. Ema Lori fatuk imi lori fatuk. Ita labele tiru mate ema ho kilat wainhira sira la uza kilat,”dehan Major General Lere Anan Timor horseik (17/7) iha Quartel Geral F-FDTL Fatuhada, Dili.
General fitun ruan ne’e hatutan, PM sira nia missaun mak ba rekonsilia no ba hakalma emosaun. Segundu ho missaun ida ne’e, autoriza sira la bele lori kilat sira ba dezarma. PM nia seguransa iha kareta laran. PM buka atu dezarmadu ba rekonsilia hakalma nervus, hakalma emosaun no kontrola situasaun.
Lere husu wainhira ninia elementus sira hasoru violensia iha fatin ruma, fila kedan ba nia Quartel Geral hodi rona instruksaun husi Komando. Hodi rona ordem foun.
“
Hau nia ordem atu tuir ka la tuir, atu halo ka la halo, hau mak sei fo ordem, tamba ida ne’e hau husu ba instituisaun hotu. Hau husu ba instituisaun PNTL atu respeita ita nia povu, ita nia juventude, respeita instituisoens hotu- hotu,”Lere apela.
Lere konfesa katak, ninia PM fo instrusaun lolos, respeita ema, hare ema atu respeita ho primeiru tenki buka halo oinsa transforma at ba mentalidade diak. Transforma situasaun ida ba situasaun diak. Laos ho violensia deit.
“Ita hatene katak ita nia juventude foin mak sai husi konflitu, sei fresku hela sira nia memoria, no sira nia kakutak,”Lere komenta.
Tuir Lere, iha tempu okupsaun Indonezia Timor oan fahe deit ba rua ida iha otonomia no ida seluk lakoi otonomia hakarak ukun –an. Iha ukun-an, agora fahe ba ba malu, kahur malu, dala ruma la kuinhese malu. Ida ne’e mak provoka situasaun, maibe Timor oan rasik rezolve ninia problemas hanesan sidadaun nasaun ne’e nian.
Discussion about this post