Radio, online – Prezidenti partido Conselu Nasional Rekonstruksaun Timoreses (CNRT) Kaya Rala Xanana Gusmao liu husi diskuasaun ho kuadrus Superior CNRT husi nasional to’o Distritu hodi halo diskusaun opsaun 3 atu ba forma V governu Konstitusional.
Diskusaun ho kuadrus Superior CNRT ne’e halao iha sede Convensau Centru Dili, Domingu, (15/7). Iha palestra prezidenti CNRT ne’e fo opsaun tolu (3) mak hanesan, premeiru CNRT sai opozisaun. Opsaun segundu forma governu Unidade Nasional no Governu grande inkluzaun ikus Opsaun forma governu entre CNRT+PD+Frente Mudansa no forma governu entre CNRT+FRETILIN.
Antes tama ba diskusaun Xanana apela ba kongresista sira atu halo analiza no estudu klean ba oposaun 3 ne’e hare ba ninia vantazen no dezvantazen. Diskusaun ba opsaun 3 ne’e fo kedan ninia tempu oras hitu (7) nia laran.
“Hau husu ba imi strutura tomak CNRT nian husi nasional no sira mai husi distritu atu halo analiza ne’ebe mak klean. Husi rezultadu ne’e mak sei sai formasaun ba V governu konstitusional,”dehan Xanana.
Atu alkansa diskuasaun ne’e lao ho diak Xanana orienta fahe ba grupo 3. Tuir opsaun ne’ebe mak iha. Ba premeiru opsaun lidera husi Dionisio Babo, iha opsaun segundu lidera husi Vicente Guterres no opsaun terseitu lidera husi Bendito de Jesus.
“Ita hanesan partidu bo’ot, ita agora atu hasai hanoin ba malu no koalia ba malu, ho liafuan barak katak, atu debate konaba koligasaun, iha rai barak, partidu ida atu kaer ukun presisa garantes estabilidade Governasaun katak, Governu ida sei la monu iha dalan klaran,”haktuir Xanana.
Liu husi Koordenador Geral Kampaina CNRT, Francisco Kalbuadi dehan, partidu CNRT hahu dala ida tan nia konferensia nasional mai kompleta konferensia ne’ebe halao uluk tiha ona antes eleisaun katak, kualker rezultadu eleisaun parlamentar nian, partidu CNRT sei hamutuk atu halo desizaun ida ke’e kolektivu.
“Tuir lolos hanesan partidu ita tomak fo ona fiar ba partidu, maibe Presidenti partidu nian ema ida ke’e demokratiku tebes, tanba ne’e maka ita hamutuk konvoka fali konferensia ida ne’e hodi ita hotu hamutuk desidi saida maka ita hakarak halo ba nasaun ida ne’e,”haklaken Kalbuady Lay.
Kordenador Jeral kampanha partidu CNRT ne’e sublinha, nia parte hakarak agradese ba ema hotu-hotu no povu hotu-hotu ne’ebe fo ona nia fiar ba partidu CNRT.
“Ami hotu iha ne’e, hau hakarak deklara katak, ami hotu fo apoio barak ba ita bot (maun bot Xanana) atu kontinua rai ida ne’e hodi lori desenvolvimentu ba povu tomak,”afirma Kalbuady.
Sekertairu Geral CNRT, Dionisio Babo hateten, CNRT nudar partidu ida foin hamrik iha 2007, hare ba istoria, CNRT mosu kedas desde uluk hodi hakuak Timor oan hotu, la hare ba nia kor, rasa no partidu, aswain sira ne’e balun mate ona no balun sei moris, ita hakruk ba sira.
“CNRT hetan kadeira 30 tuir apuramentu nasional ne’ebe CNE hasai tiha ona katak, CNRT hetan kadeira 30, ida ne’e hatudu katak, partidu CNRT hetan koanfiansa makas husi povu, ne’eduni agora ita hare ba interese nasional,”dehan Dionisio Babo. CNRT tomak, CNRT nia oan tomak tenki fiar an atu lao ba oin hodi desenvolve povu nasaun ne’e nia futuru.
“Momentu ne’e istoriku tanba ita hotu iha partidu CNRT atu desidi futuru nasaun ne’e nian iha tinan 5,”koalia Dionisio.
Rezultadu husi diskusaun nasional ne’e sei fo sai ninia rezultadu liu husi konferensia da emprensa tuku 17:00 otl.
Discussion about this post