Radio, online – Sekreterio Geral, Partido Congresu Nasional Rekonstrusaun Timorense (CNRT) Deonisio Babo fo sai katak, to’o agora dadaun ne’e struktura nasional seidauk hanoin modelu atu forma V governu konstitusional.
Sekger CNRT hato’o lia hirak ne’e liu husi konferensia da emprensa, Kinta (11/7) iha sede CNRT bairo Grilhos, Dili.
Tuir Deonisio, agora dadaun CNRT sei hein hela apuramentu nasional, publikasaun Tribunal Rekursu konaba desijaun.
“Laiha partido ida mak manan maioria, tamba ne’e ita presiza halo oinsa mak ita serbisu hamutuk iha ideias barak. Balun koalia konaba konseitu unidade nasional, governu grande inkluzaun no aliansa maioria parlamentar,”Dionisio esplika.
Tuir konstituisaun CNRT hanoi katak tenke obta hanoin sira ne’ebe mak serve interese nasional lao husi primeru to’o fim. Governu ne’ebe mosu mai tenki hakruk ba Planu Estratejiku Dezenvolvimentu Nasional.
Ho razaun ne’e, CNRT sei halo konferensia nasional ne’ebe sei halo iha Domingo (15/7) ne’ebe hanaran konferensia nasional kuadrus superior de partido husi nasional to’o sub-distritu hodi aserta idea lolos, saida mak CNRT halo konaba koligasaun.
“Hau lakoi espekula partido seluk nia hanoin, CNRT iha nia mekanismu rasik no CNRT seidauk iha desizaun koletiva. Ita hein iha Domingu oin mai mak ita hatene lolos desizaun saida ba V governu ne’e,”nia komenta.
Rezultadu elesaiun parlamentar foin lalais ne’e, partido CNRT hetan kadeira 30, FRETILIN kadeira 25, PD hetan kadeira 8 no Frente Mudansa hetan kadeira 2.
Iha parte seluk, Sekertairu Geral Partido Demokratiku (PD) Mariano Assanami Sabino la konkorda ho governu Unidade Nasional. See mosu governu Unidade Nasional demokrasia iha nasaun ne’e laiha ona. Iha nasaun demokrasia tenki iha governu no opozisaun, buat rua ne’e tenki iha, see lae hari partido hakarak deit mak buka ukun.
Hau hanesan ema demokratiku sei la simu governu unidade nasional. Ita hein deit saida mak CNRT ho FRETILIN nia desizaun. Ami PD sei mantein nafatin pozisaun,”Assanami komenta.
Discussion about this post