Radio, online – Partisipasaun feto iha vida politika importante teb-tebes, tanba ne’e wainhira partido Congresu Nasional Rekonstrusaun Timorense (CNRT) manan iha eleisaun tinan ida ne’e, sei haforsa ka hametin diak liu tan feto nia pozisaun iha vida politika.
“Partisipasaun feto, nomos iha estatuto partido CNRT rasik fo ona prersentazen bo’ot, tuir ita hatene katak, lei eleitoral mos garante partisipasaun feto nian ona, maibe bainhira ami manan, ami sei reforsa ka sei ajuda feto maluk sira, liuliu sira ne’ebe la iha oportunidade atu aprende iha eskola, ka edukasaun formal, treinamento ita sei haforsa feto para bele hametin liu tan pozisaun feto iha vida politika iha futuru,’’hateten reprezentante partido CNRT, Fernanda Lay foin lalais ne’e (28/06).
Kona ba asuntu ne’e hetan resposta mos husi reprezentante partido ASDT,Emilia da Costa,ne’ebe hateten hanesan ema ne’ebe tama iha lista Kandidatura partido ASDT, nia hare katak feto nia partisipasaun maximu tebes iha prosesu foti desizaun ruma iha partido ne’e nia laran.
“Hau naran tama iha lista kandidatura,ami partisipasaun no atu foti desizaun, liu-liu iha ami nia partido laran,hetan duni partisipasaun ne’ebe maximu, no ami rekuines katak, desizaun ne’ebe mak ami foti sempre hetan atensaun husi ami nia lideransa mane ka husi ami nia prezidente,’’nia haktuir .
Asuntu hanesan mos hato’o husi representante PDL, Olandina de Oliveira, katak,involve feto iha vida politika ne’e hanesan buat foun ida, maibe oinsa atu haka’as a’as atu bele dezenvolve feto sira mos dereito hanesan ho mane sira.
“Hau nudar feto ida, hanesan lideransa kandidatura ba parlamento, hau senti katak, buat ne’e todan mai hau, maske foun,maibe hau sei buka haka’as a’an atu bele desenvolve feto sira dereito hanesan mos mane, tamba ita lei konstituisaun hateten ona katak, feto mos dereito hanesan mane, ne’e duni nudar lideransa ida, hau tenke fo suporta ba hau nia feto maluk sira ne’ebe oras ne’e ami hamutuk iha ami nia partido nia laran,atu hala’o ami nia servisu nudar feto ida, atu nune’e feto ho mane mos bele sai forti,’’nia hateten.
Entertantu reprezentante partido FRETILIN, Florentina Martins dehan, hare ba iha area edukasaun,presiza tebes feto nia partisipasaun tanba hare ba dadus ne’ebe iha, maioria feto sei hela iha numeru rua, no ladun hetan partisipasaun iha area edukasaun.
Tanba ne’e FRETILIN garante, karik ba iha gokvernu sira sei tau edukasaun area importante no saude, tanba feto hetan kondisaun ne’ebe mak ladun diak, fasilidade minimu, kondisaun la iha, no la iha tratamentu espesial.tanba ne’e. Tuir FRETILIN komprimisiu politiku iha responsabilidade moral atu hadia kondisaun hotu.
Florentina hanesan kandidata ida nee’be mak hetan fiar husi hau nia partido FRETILIN tama ba iha lista kandidatura ida ne’e,hau hakarak fo sai iha ne’e katak,karik FRETILIN fila ba ukun ba governu, ami sei fo atensaun maximu ba povu tomak, especial ba feto, tuir ami kompreimisiu politiku ne’ebe mak pontu lima (5) importante atu hare ba situasaun povu timor liu-liu ba feto maluk sira.
Florentina hanoin, dezisaun politika partisipasaun feto iha area politika ne’e importante tebes, tanba iha sira partido, sira garante tebes, no sira hare katak, fo oportunidade bo’ot tebes ba iha dezisaun politika iha nivel nasional, distritais to’o iha baze.
Discussion about this post