Radio, online – Liu husi publikasaun husi Ministeriu Saude fo sai iha salaun Vila-verde Segunda, (11/6) dehan katak, Distritu Dili sai premeiru lugar ema barak liu mak positivu moras HIV/AIDS ho total ema agora dadaun iha 222.
Ba jornalista Diretora Nasional Saude Komunitaria, Isabel Maria Gomes dehan, hahu husi tinan 2003 -2012 numeru komulativu ema mak hetan moras ne’e hamutuk 273, mane 138 no feto 135.
Husi kazu sira ne’ebe relata ona iha ema nain 30 mak mate no nain 57 mak sei hetan hela tratamentu ho objetivu atu hemu aimoruk hodi hanaruk moris ne’ebe saudavel no atu hamenus produsaun virus iha ema nia isin. Husi numeru kazu ne’ebe refere maioria ho idade produtivu huhu husi tinan 15-44 ho distribuisaun mane barak liu kompara feto.
Diretor ne’e mos dehan kazu HIV/SIDA “ba distritu sira mak hetan moras ne’e hanesan Distritu Dili ema nain 222, Distritu Bobonaro ema nain 19, Distritu Baucau ema nain 11, Distritu Ermera ema nain 4, Distritu Ainaro ema nain 3, Distritu Aileu ema nain 3 no distitu sira seluk .
Iha tinan 2012 hahu husi fulan Janeiru –Marsu, Ministeriu da Saude identifika ona kazu moras HIV/AIDS hamate ema nain 11. Mane nain 6 no feto nain 5.
Diretora ne’e afirma liu, liu husi oportunidade ida ne’e Ministeriu de Saude liu husi Departamentu sistema informasaun no kolobora hamutuk programa HIV/AIDS no Komisaun nasional Luta Kontra HIV/AIDS sei hato’o relatoriu dadus HIV/AIDS iha Timor-Leste kada fulan tolu.
Komesa agora ba oin Ministeriu da Saude informa katak NGO internasional no nasional sei la autoriza atu fo dadus arbiru. Dadus HIV/AIDS sei fo sai direitamente husi Ministeriu da Saude no kolobora hamutuk ho Komisaun Nasional Luta Kontra HIV/AIDS .
Iha fatin hanesan Vice Presidenti Komisaun Nasional Luta Kontra HIV/AIDS, Aguia Belo Ximenes esplika, durante ne”e iha sira nia parte servisu konaba atu halo advokasia no asisti governu atu fo rekomendasaun saida mak atu halo konaba HIV/AIDS nomos oinsa atu haforsa liu tan no monitoriza planu implementasaun estratezia nasional ne’ebe mak Timor-Leste iha.
La ses husi planu sira ne’e tenke bazia mos ba dadus husi Ministeriu de Saude ninian no liu husi dadus sira ne’e bele dezenvolve programa HIV/AIDS.
Discussion about this post