Radio, online – Liu husi konfrensia imprensa ne’ebe halao iha sede UNMIT (Obrigado Barrack) Dili 6/6/12 Reprezentante Espesial husi Sekertariu-Jeral ONU nian iha Timor-Leste Ameerah Haq senti laran susar tebes atu husik hela nasaun murak ida ne’e.
Liu husi konfrensia imprensa despedida nian Ameerah Haq afirma ba jornalista sira katak nia sei husik hela Timor-Leste iha loron 9,fulan junho 2012 no atu ba simu nomesaun foun iha nasaun novaiorke hanesan sub-Sekertariu-Jeral ba ONU nia departamentu ba apoiu Misaun iha terrenu ne’ebe tau matan ba misaun mautensaun no politika sira hotu.
“hau mos sai husi Timor-Leste ho sentimentu katak hau fiar metin e hau iha konfiansa makas ba nasaun ida ne’e,hau sorti katak hau bele sai iha momentu depois de elisaun presidensial kompleta ho suksesu no seremonia ne’ebe kapas tebtebes.
Selebra aniversariu ba dala XI ba restorasaun indepedensia ho nune hau hatete ba ema katak ne’e momentu ida ne’ebe hau bele reflete ba hau nia aan rasik,hau hare katak husi transizaun diak husi presidenti ne’ebe troka fali ho presidenti foun hare katak demokrasia buras tebtebes e hare katak instituisaun sira ne’e forte orgaun jestaun eleitoral ne’ebe halo jestaun ba elisaun servisu diak tebtebes no instituisaun ne’e sai forti, “Haq konfesa.
Reprezentante ONU nian ne’e afirma liu tan katak nia hare polisia nasional Timor-Leste halo sira nia papel ONU involve makas ho sira durante ONU halo misaun iha Timor-Leste no fo apoio ba sira nia kapasidade no sira nia abilidade atu halo sira nia papel lolos hodi garantia siguransa ba populasaun sira iha Timor-Leste.
“Hau sai, hau sei fiar metin katak buat hotu tuir dalan ne’ebe los katak nasaun murak ida ne’e demonstra ou hatudu tia ona ba mundu tomak maske infelismente la iha esprensia ne’ebe atu hanesan ho nasaun sira seluk tamba iha konflitu no prekupasaun maibe Timor-Leste foin mak selebra aniversariu ba dala XI hatudu momos ba mundu tomak katak bainhira iha kombinasaun diak konpostu husi lideransa vizaun abordajen ne’ebe lolos husi oposizaun ne’ebe iha responsabilidade maka’as husi igreja no sosiadade, lia nain no membru komunidade ne’ebe ema ida-idak iha responsabilidade,povu Timor tomak hatudu ne’e signifika katak Timor-Leste tuir dalan ne’ebe los dezenvolvementu konaba ida ne’e hau senti kontenti,”Haq akresenta
Xefi UNMIT ne’e senti tristi tamba sei husik hela nasaun kapas ida ne’e, Haq mos fiar metin tamba UNMIT bele lidera didiak husi Vice Sekertariu-Geral Finn Rieske Nielsen nia sei sai xefi interinu. Finn hatene didiak nasaun ida ne’e e sei sai kolega diak ba ba Timor-Leste ho kontestu ida ne’e Haq sei fiar metin katak misaun UNMIT sei hetan lideransa ne’ebe diak tebtebes.
Discussion about this post