PNTL Baucau Sulan Ema Nain 2 Iha Sela

Radio, online – Polisia Nasionál Timor-Leste (PNTL) distritu Baucau   oras ne’e dadaun detein hela ema nain rua ne’ebé koko atu kria instabilidade iha sentru votasaun.

Ema nain ida polisia kaptura iha sub distritu Quelicai tanba tuda fatin sentru votasaun no ida seluk kaptura iha Baguia tanba insulta membru polisia ne’ebé hala’o hela seguransa iha sub distritu refere.

“Polisia Baucau detein hela ema nain rua, ne’ebé kaptura husi sentru votasaun eskola Primaria Kulugia tanba tuda sentru votasaun, no ida tan iha sub distritu Baguia tanba insulta fali polisia ne’ebé tolok ni koalia liafuan aatba PNTL,” dehan koordenadór STAE Distritu Baucau Lúcio Freitas ba jornalista Tersa (17/4) iha edifisiu STAE Distritu Baucau.

Nia hatutan, akontesimentu ne’e polisia koko atu halo diálogo ho suspeitu sira maibé lakohi no lori fali katana ne’ebé hakarak atu ameasa fali polisia. Tan ne’e parte PNTL halo atuasaun ni detein hela sira hodi halo prosesu investigasaun. “Ohin (Tersa  red) ha’u konfirma prosesu investigasaun la’o ona, iha Baguia la’os akontese iha sentru votasaun maibé akontese iha vila. Autor ne’e pretense ba suku Alawa kraik, sira nain rua mesak mane hotu,” esplika Lúcio Freitas.

Lúcio esplika tan katak, situasaun iha Distritu Baucau enjerál la’o normal durante prosesu eleisaun hahú husi simu material sensitive husi STAE nasionál iha loron 9-15 Abril hodi halo distribuisaun material ba iha sentru votasaun.

Iha fatin seluk Komandante PNTL Distritu Baucau Superintendente Xefi Faustino da Costa hateten, PNTL kaptura ema ida iha sentru votasaun tanba koalia barak iha sentru votasaun no lori mos katana iha sentru votasaun.

“Nia koalia barak iha sentru votasaun no lori mos katana bo’ot ida iha sentru votasaun, ha’u nia komandante sub distritu mos iha ne’ebá, ne’ebé atende hela kazu ne’e no buka meius foti ema ne’e no ema ne’e lanu todan ema ne’e ami tau iha ami nia fatin.” Dehan Faustino.

Nia hatutan, ema ne’ebé mak PNTL kaer la’os kaptura maibé atu halo prevensaun atu nune’e aktividade hanesan labele akontese tan tanba ema ne’e lanu.Kazu ne’e akontese iha sentru votasaun Eskola Primária Kuluguia sub-distritu Quelicai, distritu Baucau.