Radio, online – Sosiedade sivil asuntu seguransa no defeza, Fundasaun Mahein (FM) deskontenti ho esteitmentu komandante F-FDTL Major General Lere Anan Timor dehan ema ne’ebe mak halo atus violensia durante eleisaun sei tiru mate.
FM relata komunikadu da emprensa ne’e ba publiku liu husi radioliberdadedili.com husi via email Tersa, (9/4). FM deskontenti los ba esteitmentu ida ne’ebe haforsa violensia, tensaun, trauma no hatauk ba populasaun.
Esteitmentu ida ne’e mos hanesan bareira ida atu taka fali prosesu demokratiku ne’ebe mak populasaun atu hala’o hodi hili ita nian ulun boot estadu nian.
“FM hakarak fo’o hanoin ba komandante institusaun rua ne’e nian katak, direitu povu nian hakerek nanis tiha ona iha ita nian lei inan. PNTL no F-FDTL nian kna’ar mak tenki defende lei no proteze i serve komunidade. Ita nian sistema justisa iha ona, ne’e duni ita nian forsas siguransas sira labele tau lei iha sira nian liman ho sistema ida tiru uluk depois mak husu ikus,”dehan Diretor FM Nelson Belo.
FM husu ba institusaun siguransa sira nian atu halo aprosimasaun ho povu duke uza liafuan retorikal ne’ebe ho violensia. Tradisaun Timor-Leste nian hanesan sorumutu Nahe Biti Boot hanesan modelu ida hodi ba F-FDTL ho PNTL halo aprosimasaun ba komunidade.
Kna’ar forsa rua nian maka tenki mantein ordem no seguransa ne’ebe difini ona iha lei. Dala ida tan FM husu para forsa rua ne’e halo atividade ida ne’ebe integradu iha sira nia operasaun durante periode eleisaun.
FM rekomenda ba komadante PNTL no F-FDTL atu halo deit estetmentu hirak ne’ebe mak hatudu intensaun ida ne’ebe mak rezolve problema.
Komandante uza pozisaun hodi apela ba politika nain sira katak politika nain sira tenki hado’ok sira nian milititantes husi konfrontasaun hodi kria paz iha prosesu demokratiku ida ne’e.
Timor-Leste nasaun ida ne’ebe mak ki’ik maibe kuinesidu iha mundu tomak, no FM husu nafatin nasaun ki’ik ida ne’e hatudu nian ezemplu diak ida ba nasaun pos-konflitus sira seluk iha mundu ida ne’e.
Discussion about this post