Radio, online – “Ita nudar Forsa Defeza nasaun Timor Leste nian tenki hatudu profesionalizmu servisu nudar militar no disiplina maka’as,”dehan Major General Lere Anan Timor iha serimonia inagurasaun edifisiu foun Quartel Geral F-FDTL no Ministeriu da Defeza Tersa, (3/4), Fatuhada, Dili.
General Lere dehan, F-FDTL tenke hatudu katak Timor Leste nia ema sira mos bele halao servisu ho profesionalizmu, laos deit hare deit ba malae sira deit mak bele.
General fitun rua ne’e husu ba forsa halos seguransa iha portaun oin tenki hamrik 24 oras. Laos hein likrauk, laos hein to’os maibe tenke hatudu ba ema estrajeiru katak nasaun TL iha disiplinadu maka’as, hanesan Falintil sira hatudu iha ailaran durante 24 anos.
Razaun Lere husu tenki iha disiplina no profesionalizmu tamba edifisiu foun ne’e hamrik iha estrada publiku, ne’ebe ema iha fatin-fatin mai liu sempre hateke ba laran.
“Ita mos bele la’os ita gaba-an deit, se lae ema seluk mak ukun ita nafatin,”Lere komenta.
Iha biban ne’e Prezidenti da Republika Jose Ramos Horta liu husi nia diskursu husu ba ba forsa F-FDTL no PNTL maske iha uma foun, bele iha kilat oin -oin , ita bele terino oin -oin, maibe kualidade forsa labele lakon. Forsa tenke kaer umanidad, forsa ejiste atu defende povo. Signifika povo tenke fiar instituasaun rua ne’e.
“Povu tenki fia imi, la bele tauk imi, atu povu hare imi ho kontente ne’e mak signifika bo’ot liu ba PNTL no F-FDTL,”Horta apela.
Ho lia menon PR Horta husu membru instituisaun estadu nian ne’e tau matan ba povo hanesan inan-ama, tau matan ba povo hanesan alin sira. Tenki hatudu komportamentu diak ba povo, ne’e mak susesu atu sai profesionalizmos.
Edifisiu Quartel Geral F-FDTL ho Ministerio da Defeza ne’e hetan suporta husi povo Xina liu husi Embaxada iha Timor Leste, ho total orsamento 10 Miloens dollar Amerikanu.
Discussion about this post