Radio, online – La liu iha eleisaun Prezidensial, Prezidenti Republika Jose Ramos Horta, Kinta, (29/3) halao vizita ba Kuartel Jeral F-FDTL foun iha Fatuhada hodi despesdida ba forsa TL nian ne’e.
“Vizita ne’e hanesan despedida ona, maske iha fulan rua nia laran hau sei halo enkontru ho Xefi Estado Maior ho forsas sira. Hau hanesan Komandante Supremu fo agradesemenu ba forsa sira ne’ebe fo apoiu maka’as ba hau durante tinan lima nia laran,”dehan PR Horta.
Liu husi vizita ne’e PR Horta husu nafatin ba forsa armandas atu mantein nafatin fo defeza no seguransa nasaun ho povu ne’e. Forsa hanesan ain liman kroat povu nian hodi defende povu. Forsa mak iha ema povu ki’ik no ema kbit laek sira nia kotu. “Hau apela ba forsa sira atu tau disiplina no halao knar tuir lei ho ordem.
Ba futuru, hau husu ba Prezidenti foun atu nafatin Fo atensaun ba forsas no tau kondisaun diak tuir dezenvovlimentu nasaun ne’e nian,”PR Horta apela.
Iha fatin hanesan Major General Lere Anan Timor dehan, ho vizita PR Horta nian ne’e fo nafatin konfia ba F-FDTL atu kontribui mantein ba paz iha nasaun ne’e, liliu atu hasoru eleisaun II ronda Prezidensial no eleisaun Parlamentar iha fulan hirak mai ne’e.
Lere mos iha nia sentiment bo’’ot fo obrigadu no agradese ba PR Horta ne’ebe durante tinan lima nia laran fo atensaun tebes ba aktividades forsas no moris forsas nian atu sai diak liutan. “
Hau agradese tebes kolega Ramos Horta maske iha tempu badak nia laran husik nia kargu maibe forsas nafatin husu tulun atu fo hanoin ba forsas atu hadiak liutan iha future,”Lere komenta.
Discussion about this post