Radio, online – Kandidatu Independente, Rogerio Lobato, Manuel Tilman no partido Khunto hato’o deklarasaun politika ba segundu ronda eleisaun prezidensial fo apoiu ba Francisco Guterres Lu-Olo hodi kompete ho Taur Matan Ruak.
“Hau hamutuk ho hau nia votantes sira no militantes partido KOTA fo apoiu ba Lu-OLo iha segundu ronda ba eleisaun prezidensial,”dehan Manuel Tilman ba jornalista iha uma fukun Parlamentu Nasional Tersa, (20/3).
Razaun Manuel Tilman fo apoiu ba Lu-OLo tamba durante iha tinan lima nia laran iha PN partido KOTA sempre suporta FRETILIN.
“Ami nia partido uluk kedasa fo apoiu ba Lu-OLo iha eleisaun 2007 maske iha tempu ne’eba Lu-Olo lakon. Dala ida tan ami fo nafatin apoiu ba LU-OLo,”Tilman komenta.
Vice Partido Khunto, Olinda Guterres hakat ba sede ekipa susesu Lu-Olo nian iha Hudi laran hodi koalia pozisaun Khunto nian atu fo apoiu ba Lu-Olo iha segundu ronda eleisau prezidensial ne’ebe sei kompete ho Taur Matan Ruak.
“Hau mai iha sede Lu-Olo nian ne’e hatudu katak Khunto iha nia pozisaun atu fo apoiu ba Lu-Olo, maibe hau sei fila hodi deskuti ho strutura Khunto hodi halo deklalasaun politika,”Olinda esplika.
Vice Prezidenti FRETILIN, Arsenio Bano dehan, odamatan Lu-OLo nian nakloke ba ema hotu atu fo apoiu maskem Lu-OLo kandidatu mai husi partido. Tamba iha kampaina FRETILIN nia kandidatu see manan sai Prezidenti ba povu Timor Leste.
“Ami agora dadaun halo kontaktu ba Kandidatu sira ne’ebe mak la liu ba segundu volta hodi husu apoiu,”Arsenio dehan sai.
Antes ne’e mos depois eleisaun sei sura iha rezultadu porvizoriu nia laran, Kandidatu Independente Rogerio Lobato ne’ebe sai husi strutura FRETILIN fo sai nia deklarasaun politika fo apoiu ba kandidatu Lu-OLo iha segundu ronda eleisaun sei mai ne’e.
“Hau husu ba apoiantes sira mak fo votus ba hau, hau husu ba imi atu iha eleisaun mai ne’e tenki vota ba Lu-OLo,” Rogerio apela.
Discussion about this post