Radio, online – Aktul Prezidenti da Rerpublika nomos Kandidatu Prezidenti Jose Ramos Horta fo parabens ba Kandidatu Francisco Guterres Lu-Olo no Taur Matan Ruak, (TMR) ne’ebe sei kompete iha eleisaun segundu ronde iha hodi hakat ba palacio Prezidenti.
“Hau sei lahalo deklarasaun politika hodi husu ba hau nia apoiantes sira atu fo votus ba kandidatu nain 2 mak tama ba segundu ronde. Hau husu ba apoiantes sira atu uza konsensia sira nia rasik hodi hili ba ema ida ne’ebe sira fiar atu sai prezidenti,”dehan Horta iha Palacio Prezidenti Aitarak Laran, (19/3).
Horta fo paraabens ba povu TL laran tomak maske iha udan bo’ot no dezastre natureza oinoin esforsu hodi hakat ba fatin votasaun hodi ezerse sira nia direitu. Antes ne’e Horta hirus tebes ba lei ne’ebe haruka povu ki’ik no kiak sira tenki ba sira nia fatin resesenamentu eleiotal hodi sai fatin votasaun.
PR Horta mos dehan, iha eleisaun parlamentar fulan Junhu mai ne’e, Horta iha direitu atu hili partido ida tamba la asumi ona kargu Prezidenti da Republika.
“Iha eleisaun parlamentar hau sei ajuda partido ida hodi manan maioria, hodi nune’e forma governu diak no halao servisu ho efektivu,”Horta esplika.
Kandidatu Jose Ramos Horta la tama ba sungundu ronde tamba votus la to’o no lakon husi Taur Matan Ruak.
Rezultadu provizaoriu iha eleisaun ne’e Lu-Olo ho votus 128.226 (28,45%), Taur Matan Ruak 113.553 (25,18%).
Discussion about this post