Radio, online – Politiku sira iha Governo no Parlamentu Nasionál viola tiha ami nia direitu tamba sira halo Lei Elitorál ne’e tuir sira ninia interese deit, dehan elitór Joao da Costa iha Colmera, Dili.
Ami ohin labele bá vota nudar parte ida hosi ami ninia direitu tamba laiha ona transporte hodi ami bele bá vota iha ami nia suco, dehan nia.
“Politiku sira halo lei ne’e tuir sira nia interese deit no nunka tau povu ki’ik sira ninia direitu iha leten. Ne’e violosaun ba mi ninia direitu,” Costa hateten ho nakdedar.
Iha sorin seluk, Anita da Silva mós hateten nia labele vota iha ninia suco iha Atauro tamba laiha ona transporte no husu ba politiku sira hodi bele altera Lei Elitoral ne’ebé la fó benefisiu ba povu sira ninia direitu.
Nia esplika, “ ha’u lakon duni diretu tamba labele vota ba kandidatu ne’ebé ha’u hakarak atu hili hodi ukun rai ida ne’e.”
Tuir nia, laos deit povu sira mak lakon direitu, maibe politiku sira mós lakon votu tamba ema barak mak labele vota tamba deit ho lei refere.
“Ami hein katak, politiku sira bele serbisu hamutuk ho CNE no STAE hodi bele muda lei ida ne’e. Se lae sei fó impaktu ba rezultadu elisaun tuir mai,” nia hatutan.
Parlamentu Nasioanál semana kotuk diskuti hodi amdenda Lei Elitorál refere, maibe la pasa tamba deputadu AMP nian barak mak vota kontra alterasan ba lei ne’e.
Membru Parlamentu AMP sira vota kontra proposta alterasaun ne’e ho razaun atu evita manipulasaun iha elisaun laran.
Tuir dadus STAE nia, total votante sira mak liu 600. 000 no hosi total numeru ne’e nain rua ona mak la vota ona, oinsa kona-ba elitór sira seluk ne’ebé karik la konsege mós?
Elisaun presidensial ne’e elisaun datoluk hafoin Timor-Leste hetan ninia independensia iha luta naruk durante tinan 24 hodi kontra okupasaun militar Indonesia nian. Alberico Junior
Discussion about this post