Radio, online – Kandidatu Prezidenti da Republika periodu 2012-2017, Manuel Tilman lansa programa politiku ne’ebe sei halao iha kampania nia laran hare liu ba vida ekonomia nasaun ne’e nian.
Tuir Prezidenti Komisaun C Parlamentu Nasional ne’e, Timor Leste atu avansadu dia liu no povu ne’e moris diak tenki tau prioridades ba seitor ekonomia.
Manuel Tilman halao serimonia lansamentu politiku hanesan kandidatu independente no sivil Kuarta, (15/2) iha Otel Timor.
Manuel Tilman hatutan, wainhira eleitu nudar Prezidenti Republika periodu 2012-2017 nia sei hare liu ba iha prinsipiu hitu mak hanesan. Dezenvolvimentu ekonomiku sustentavel, dezenvolvimentu humanu i integradu, ekonomi dezenvolvimentu, dezenvolvimentu ekonomia aberta, dezenvolvimentu ekonomia merkadu, visaun ekilibriu makro ekonomiku, dezenvolvimentu ekonomiku sosial e prosperiedade.
Manuel Tilman husu ba se deit ba manan iha eleisaun ne’e tenki parseiru ekonomia, finansas atu nune’e bele komprende saida mak konstituisaun hakerek hodi jere didiak riko soin mina no gas. Manuel Tilman mos kestiona ba problemas bee mos no elektrisidade ne’ebe agora sai preokupasaun ba povu.
“Ita nia estadu ne’e tenki halao ko;operasaun diak ho Ministeriu kompatente hodi nune’e bele resolve elektrisidade ne’ebe to’o ohin loron sai preokupasaun bo’ot ba povo ida ne’e,”Tilman lamenta.
Tilman mos krika governu AMP ne’ebe fakar orsamentu ho montante bo’ot maibe realidade la iha povu sei susar no terus hela deit no la benefisia povu nia ekonomia.
“Hau mak povu fo fiar sai duni Prezidenti da Republika hau sei haka’as an hodi responde nesesidade povo nia moris iha nakukun nia laran sei lori ba naroman no mos sei lori nasaun ba future ho klaru no diak liu,”tenik Tilman.
Discussion about this post