Radio, online – Kandidatu Prezidenti Independente Rogerio Tiago Lobato halao vizita ba Fundasaun Mahein (FM) hanesan sosiedade sivil ne’ebe durante ne’e halo peskiza ba area defeza no seguransa. Iha okaziaun ne’e Rogerio Lobato rekomenda katak, atu hases-an husi violasaun direitus humanus diak liu husi PNTL unidade Batalhaon Ordem Publika (BOP) labele uza kilat bo’ot.
Razaun Rogerio foti kestaun ne’e tamba, iha momentu I Governu Konstitusional, Rogerio hanesan Ministru Interior fo autoriza uza kilat bo’ot mak URP no BPU.
“Iha hau nia tempu hau autoriza ba URP Ho UPF mak kaer kilat bo’ot. Lolos Unidade seluk-seluk ne’ebe hanesan intervensaun rapidu labele kaer kilat bot tamba sira kundu kaer kilat bo’ot dala ruma sira uza ladiak sira bele halo violasaun,”Rogerio lamenta.
Iha vizita ho FM ne’e kandidatu independente ne’e koalia konaba ninia prespektiva nudar kandidatu Presidenti ba period 2012-2017, iha area defeza no siguransa, liu-liu planu atu moderniza kilat F-FDTL no PNTL nian iha futuru.
Iha sorumutu ne’e Rogerio afirma ba jornalista sira katak nia senti kontente ho Timor oan sira ne’ebe hari’I Fundasaun Mahein hodi fo hanoin konaba asuntu ne’ebe relevantes iha area Defeza no Siguransa nian.
“Hau nia hanoin rasik hau senti katak Timor nia Forsa ne’e kiik liu tenke bot liu tan tamba laos dehan ita hakarak forsa ida bot atu hodi halo funu kontra ema seluk funu hotu ona. Hau defende forsa ida tenke bo’ot liu tamba ita bele hatudu katak ami lakohi ataka ema ida no ami lakohi halo funu kontra ema ida,” dehan Rogerio.
Direitur Interinu FM, Frei Guterres dehan, durante inkontru ne’e FM husu perguntas ne’ebe barak ba kandidatu Rogerio no nia resposta ne’ebe diak tebes. Resposta hirak ne’e ne’e Fundasaun Mahein labele fo sai ba publiku tamba sei halo fali relatoriu ida depois mak sei publika.
Tuir FM nia hare kandidatu sira ne’ebe iha kuinesementu ne’ebe diak iha area seguransa mak hanesan kandidatu Rogerio Tiago Lobato,Taur Matan Ruak no Fransisco Luolo ne’ebe sira iha back ground mai husi Militar. FM mos sei halo enkontru ho kandidatu sira seluk tamba sai Prezidenti da Republika hanesan Komandante da Supremu.
Discussion about this post