Radio, online – Aktual Prezidenti Republika Jose Ramos Horta re-kandidata an hodi kompete iha eleisaun prezidensial ho kandidatu sira seluk. Ramos Horta hetan apoiantes eleitor husi 13 distritu.
“Hau nia re-kandidata an ne’e mai husi ema sira kiak sira. Hau iha programa lima mak atu kaer iha prezidenti tinan lima oin mai mak hanesan hametin dame no unidade, tau matan nafatin ba forsa defeza no seguransa, hametin justisa, nomos husu atu tau orsamentu maximu ba saude no edukasaun,”dehan kandidatu Horta iha salaun Canossa, Domingos (29/1), hafoin fila husi estranjeiru.
Iha oportunidade ne’e Laureadu Nobel da paz husu kandidatu sira seluk atu respeitu ba malu nafatin hodi eleisaun ne’e lao diak no hakmatek, hodi hatudu ba mundu Internasional katak, TL iha duni demokrasia.
Horta mos husu ba kandidatu sira tenki honestidade simu lakon iha kompetisaun ne’e. “Hau prontu simu konsekuensia wainhira lakon no hau sei nafatin servisu hamutuk prezidenti foun, tamba Timor nia diak iha futuru,”Horta konfesa.
Kordenador geral komisaun nasional kandidatu Jose Ramos Horta, Agusto Junior dehan, iha rai ne’e matenek barak mak bele ukun rai ne’e, maibe TL agora ba oin sei presiza Prezidenti Jose Ramos Horta.
“Ema ne’ebe iha kapasidade mak bele ukun nasaun ne’e nomos tenki iha ligasaun ho nasaun iha mundu ho diak,”Junior komenta.
Tribunal Rekursu foin lalais ne’e fo sai kandidatu mak atu kompete iha eleisau n Prezidensial mak hanesan Taur Matan Ruak, Angelita Pires, Francisco Guterres “Lu-Olo, Rogerio Lobato, Fernando Lasama no Lucas da Costa. Tuir informasaun iha publiku sei mosu tan kandidatu balu.
Discussion about this post