Radio, online – Organizasaun jornalista Timor Leste Press Club (TLPC) kria ekipa monitorizasaun hodi hare ba aktividades jornalizmu nian iha prosesu eleisaun geral tinan ne’e.
“Ita hari ekipa ne’e laos deit atu defende jornalista sira maibe atu hare mos etika jornalizmu nian iha kobertura ba eleisaun tinan ne’e,”dehan Prezidenti TLPC Paulino Quintas iha Kristu Rey iha serimonia konsolidasaun membru TLPC Sabadu, (28/1).
Prezidenti TLPC ne’e reforsa katak, iha komisaun ne’e mos husu ba kandidatu no politiku sira atu respeitu liberdade da emprensa, liliu ba jornalista sira atu livre iha kobertura eleisaun geral.
Eleisaun mai ne’e eventu bo’ot no importante tebes ne’ebe knar jornalista sei infrenta dezafiu barak liliu parte kobertura no atendementu husi lider sira.
“Ba kolega jornalista sira ekipa monitorizsaun ne’e sei atende problemas mak jornalista hasoru nune’e mos hare ba kontiudu notisias ne’ebe labele ses kode etika jornalista ne’ebe universal,Quintas reafirma.
Xefi ekipa monitorizasaun Eliterio Sousa dehan, ekipa monitorizasaun sei esforsu maka’as hodi hare ba knar jornalista nian no defende ba servisu jornalista sira wainhira hetan presaun. Maske ekipa ne’e foin mak hari maibe iha gia hodi halao knar.
“Ami sei esforsu hodi hare ba prosesu tomak konaba kobertura jornalista nian iha eleisaun mai ne’e. Hau husu ba jornalista sira see iha eleisaun mai ne’e mak hetan presaun tenki mai fo hatene ba ekipa monitorizasaun,”dehan Eliterio ho esperensa.
Iha konsolidasaun ne’e TLPC mos fahe kartaun membru hodi sai indentidade halao knar jornalista no hamahan-an iha TLPC.
Discussion about this post