Radio, online – Eleisaun Prezidenti no eleisaun Parlamentar besik ona, Comisaun Nasional eleisaun (CNE) prekupa tebes ba kondisaun estrada ne’ebe maioria a’at sai hanesan impkatu bo’ot ba prosesu eleisaun tinan ne’e.
Kestaun ne’e hato’o husi Prezidenti CNE Faustino Cardoso, wainira komemora aniversario CNE ba tinan lima Iha uma fukun Parlamentu Nasional Kinta, (19/1). Prezidenti CNE ne’e hatutan, infrastrutura hanesan estrada ninia kondisaun sai dezafiu bo’ot ba prosesu eleisaun.
Distritu mak grave ba estrada hanesan, Distritu Oe-cusse iha sub- distritu Nitibe wainhira udan tun susar atu tama ba suku. Distritu Lospalos parte Luro no Sucu Loreh, iha Baucau sub-distritu Baguia iha suku Larisula no Wakala. Kuaze iha Distritu sira iha suku barak mak sei atraza bo’ot ho estrada.
“Ita nia eleisaun ne’e monu los iha tempu udan. Ida ne’e sai dezafiu bo’ot tebes,”Faustino konfesa.
Deputado CNRT, Duarte Nunes mos rekoinese katak estrada maioria distritu sira at hotu ona, iha eleisaun mai ne’e susar tebes votantes atu tuir hotu.
“Maske estrada at, presiza tebes aumenta fatin votasaun atu nune’e votantes sira bele partisipa hodi ejerse sira nia direitu,”dehan Duarte.
Discussion about this post