Radio, online – Maske governu, liu husi Ministeriu Turismu Comercio e Industria, (MTCI) kria ona politika atu kontrolu no standariza sasan folin iha loja no merkadu , maibe realidade nesesidade baziku nia folin kontinua sae.
Maria da Silva hanesan povo ki’ik ba radioliberdadedili.com wainhira kompras iha loja starking, Segunda (19/12). Maria, sente prekupa tebes ho sasan folin ne’ebe kontinua sa’e maka’as.
Maria hatutan, antes tama ba fulan Dezembru sasan folin normal. Maibe tama iha fulan Dezembru ne’ebe mak atu tama ba loron bo’ot Natal 2011 ho tinan foun 2012 sasan folin kontinua sae.
“Sasan agora ne’e ami povo ki’ik sosa mos la bele, ami husu ba governu la bele koalia deit iha fatin maibe tenki direitamente tun ba iha baze hodi hare rasik sasan nia folin ne’ebe sae maka’as los nee,”nia apela.
Marcos Marcal mos lamenta ba sasan nia folin ne’ebe sae lor-loron hela deit. “Ita la hatene tamba saida mak folin sasan iha merkadu no loja loja kontinua sa’e maka’as,”nia lamenta.
Marcos konsedera ho sasan folin sae ne’e governu la interese ba ita povo ki’ik sira ne’e no mos la iha interese atu kontrolu sasan iha merkadu no loja sira. Marcos kestiona mos sasan sira ne’ebe mak ninia prazu liu tiha ona mos fa’an nafatin.
“Hau husu ba MTCI tenki tau matan ba problema hirak ne’e, la bele dukur demais,”Marcos kestiona.
Discussion about this post