Radio, online – Gerador foun ne’ebe sosa husi Sekertairu Estadu Eletrisidade Aqua e urbanizasaun (SEEAU) fo ba Distritu Manufahi ho kapasidade la to’o tanba ninia mega watt ki’ik liu.
Kestaun ne’e hato’o husi tekniku EDTL Distritu Manufahi, Emilio Gerson Soares ba radioliberdadedilionlie iha Same foin lalais ne’e.
Emilio informa katak, tuir lolos gerador mak atu fo ba Distritu Manufahi ho nia kapasidade 1 mega wattt, maibe narealidade gerador foun rua (2) mak aloka ba ho kapasidade 400 kilo watt, gerador 2 ne’e hamutuk 800 kilo wat deit.
Tuir Emilio hare ba konsumidores iha Distritu Manufahi tenki uza gerador ho kapasidade 1 mega watt. Kondisaun ahi eletrisidade lakan iha Distritu Manufahi halo rotativa ba bairo sira mak iha.
“Ami fahe ahi halo rotativa tanba gerador rua ne’e hamutuk 800 kilo watt fosa la to’o. Husi failansu ne’e kosumidores sira tolok fali mak ami EDTL Manufahi,”dehan Emilia.
Relasiona ho ida kapasidade gerador nian ne’ebe ki’ik ne’e hato’o ona mai iha nasional, maibe to’oa agora la iha rejultadu.
“Ami iha ne’e lorloron simu lia fuan tolok husi komuniade sira. Ami hateten ba sira (konsumodires ) ami laiha direito uza osan ba sosa gerador foun ne’e. Hakarak hatene lolos ba husu iha nasional,” Emilio konfesa.
Konfima kazu ne’e ba Deputado Bankada FRETILIN Inacio Moreira ne’ebe kontrola elektrisidade iha nasaun ne’e hatete, konaba kapasidade gerador ne’e laos iha Distritu Manufahi deit, maibe iha distritu kuaze hanesan. Sosa gerador la tuir dadus kosumidores ne’ebe iha.
Tuir Inacio, failansu ne’e tanba governo la halo levantamento dadus ba konsumedores sira iha dsitritu, tamba ne’e mak gerador barak mak keima lalais husi Distritu hotu.
‘’Ami husu ba governu presiza halo plano didia’ak atu povo labele sai vitima. Buat sira ne’e lao atu diak governu tenki servisu sistematiku iha area eletrisidade, hau fiar serbisu sira lao,”Inacio fo sujestaun.
Hatan ba prekupasaun povu Manufahi ne’e Deputado Bankada CNRT Aderito Hugo da Costa hateten, gerador ne’ebe nia kapasidade lato’o ne’e tekniko sira nia kulpa tamba sira mak simu.
“Sira mak hato kritika sira ne’e mak sala, laos fo sala mai nasional. See kapasidade la to’o labele simu haruka fila mai nasional hodi aloka ba fatin seluk ne’ebe konsumdores naton,”dehan Deputadu Same oan ne’e.
Discussion about this post