Radio, online – Forsa marineiru ida husi Estado Unidos da Amerika (EUA) soke malu ho membro CPD -RDTL wainhira fila husi asaun pasifika. Asidente ne’e mosu iha parte Leste, iha Berake area Metinaru.
Forsa marina EUA ne’e lori kareta ho marka landcruzer ho numeru polisia 21702 ne’ebe fila husi Sentru instruksaun F-FDTL, Metinaru.
Ho kondisaun velosidade maximu ne’ebe la kontroladu, konsege soke angguna ne’ebe massa CPD-RDTL sae atu fila ba sira nia knua. Kareta angguna ne’e ho numeru polisia 35614. Dezastre trafiku ne’e hodi rezulta kareta angguna nia oin kabetok tama ba laran.
“Malae ne’e halai lalais, nia la hare ami ho grupo bo’ot ne’ebe mak kareta hotu uza lampu emerjensia nian (uza lampu sen rua). Nia mai soke los hau nia kareta oin ne’e. Hau husu nia responsabiliza ba hahalok ne’e,” hateten kondutor angguna.
Iha asidente ne’e, forsa marineiru ne’e hare tanba massa CPD-RDTL barak no hakilar ba forsa ne’e, ho nune’e forsa ne’e mos tauk koko atu halai. Tanba membro CPD -RDTL balu komesa foti fatuk atu tuda kareta landcruizer ne’e.
Maibe sorte diak la kleur Membro F-FDTL fila husi Metinaru koinese forsa marina ne’e hodi hakilar ba massa CPD-RDTL hodi labele tuda. Iha situasaun hakilar no insulta forsa ne’e komesa kalma fila fali.
Ho prezensa membru F-FDTL ne’e esplika no fo koinese ba massa CPD-RDTL ne’ebe la koinese, hodi hatetete malae ne’e forsa marina EUA ne’ebe mai ajuda ita nia forsa naval.
Hodi responsabiliza ba asidente ne’e forsa EUA fo ninia numeru kontaktu no nia indireisu ba membro CPD-RDTL, hodi ba foti osan ruma hadia tiha kareta angguna ne’ebe soke sai kabetok.
Discussion about this post