Radio Oline – Iha loron 10 Agostu 2011 Tribunál Distrital Dili hala’ó audiénsia julgamentu hodi lee leitura akordaun ba kazu violasaun seksuál ne’ebé mak rejistadu iha tribunál ho numeru prosesu 269/C.Ord/TDD/2011. Kazu ne’e komete husi arguidu ES hasoru lezada GDS ne’ebé mak sei iha idade tinan 15 momentu akontesimentu.
Tuir komunikadu imprensa ne’ebe Redasaun Radio Liberdade simu katak Julgamentu ne’e derije husi Juiz Deolindo do Santos ne’ebé mak reprezenta juiz painel sira seluk, hanesan Juiz Antoninho Goncalves no Juiz Guilhermino da Silva.
Husi parte Ministériu Públiku reprezenta husi Dr. Felismino Cardozo no husi parte defeza, reprezenta husi Dr. Jose da Silva husi Eskritoriu Defensória Públika.
Iha komunikadu refere Diretór JSMP, Luis de Oliveira Sampaio haktuir katak” Tribunál kontinua hatudu progresu boot iha kontestu luta hasoru violénsia kontra feto ka violénsia bázeia ba jeneru sira; ne’e pasu signifikativu tebes iha setór justisa ne’ebé ita hotu merese atu apresia no kongratula dezempeñu ida.
Aleinde, progresu ida ne’e la ses husi eforsu Ministériu Públiku ne’ebé konsege rekolla no aprezenta provas hotu-hotu relasiona ho kazu ne’ebé mak ikus mai bele konvense tribunál hodi hamonu pena ne’ebé mak merese no realistiku ba arguidu”.
Tuir JSMP nian hanoin pena ne’ebé mak tribunál kondena ba arguidu refleta sensibilidade autór tribunál ba kazu krime sira kontra feto, liu-liu krime kontra menor idade.
JSMP mós espera katak ho pena ne’ebé mak hamonu ba arguidu, sai hanesan meius ida mós atu eduka ita nia sosiedade hodi hadook-an husi hahalok violénsia, liu-liu violasaun seksuál hasoru feto.
Bázeia ba faktus ne’ebé mak produs durante julgamentu ba kazu ida ne’e, provadu katak arguidu komete duni aktu violénsia seksuál hasoru lezada ho hahalok hanesan, lori lezada ba iha kuartu laran hodi hasai hotu lezada nia roupa no halo violasaun seksuál hasoru lezada. Ikus mai lezada isin rua no hahoris bebe oan kaduak.
Tribunál hamonu pena tinan 15 prizaun, tuir akuzasaun Ministériu Públiku nian ne’ebé mak bázeia ba artigu 172 no 173 (d) Kódigu Penál Timór Léste.
Maske nune’e, arguidu sei iha oportunidade atu hato’ó rekursu ba iha tribunál rekursu iha loron 15 nia laran, tuir lei proseksual.
Discussion about this post