Radio, online – Primeiru Ministru Kaya Rala Xanana Gusmao fo sai katak, iha tinan ne’e governu sei fo bolsu estudus ba jornalista hodi haruka jornalista Timor oan ba estudu iha rai liur.
“Tinan ne’e hau disidi tiha ona, jornalista sira mos tenki hetan bolsu estudu husi governu hodi kapasita ita nia jornalista Timor oan,”dehan PM Xanana ba Porta Voz TLPC Nelio Isac, Adjuntu Sekjer TLPC Jordao Henrique ho membru fundador TLPC Antonio Dasiparu iha sentru konvensaun Dili, Kuarta (13/7).
Iha dada lian ne’e PM dehan area importante mak atu fo ba jornalista sira atu estudus ma hanesan, area politika, area ekonomia, sosial kultura no turismu.
Atu alkansa objetivu ne’e Xanana liu husi strutura Timor Leste Press Club (TLPC), husu ba assosiasauan jornalista sira hotu mak ejizti iha nasuan ne’e tenki hamutuk. Antes atu fo bolsu estudu Xanana mos sei konvida hodi konvoka enkontru ho lideransa organizasaun jornalista hanesan TLPC, AJTL ho SJTL atu idea hamutuk.
Eis jornalista jornal A Voz de Timor iha 1975 no Radio Maubere ne’e haktuir, organizasaun jornalista la bele fahe malu, atu nune’e bele fo kontribuisaun ba media iha TL. Media tenki unidade hodi kontrola sosial ho diak liutan, hanesan media iha Indonezia nia rai seluk.
“Imi labele hamosu fali assosiasaun jornalista oioin. Se’e imi hamutuk hae sei apoiu total ba imi hodi haruka jornalista ba eskola iha rai liur,”Xanana apela.
Responde ba preokupasaun ne’e Porta Voz TLPC Nelio Isac hatete, parte TLPC sei ko’ordena ho strutura no lideransa TLPC nian hodi buka idea hamutuk hodi responde ba PM Xanana nia preokupasaun ne’e.
“Ami iha strutura ne’ebe iha, atu ba programa hotu ami sei tur hamutuk mak tau idea hamutuk. Ba programa saida deit TLPC sei halo reuniaun lao mak fo rezultadu,”Nelio komenta.
Jornalista Eugenio Pereira husi jornal INDEPENDENTE hatete, durante ne’e jornalista sira hasoru problema mak iha area kapasitasaun. Organizasaun jornalista mak hari iha nasuan ne’e laiha programa diak ba kapasitasaun jornalista.
“hau apresia ho Xanana nia hanoin mai ami jornalista hodi fo bolsu estudu ba ami atu hadia ami nia kapasidade,”nia komenta.
Discussion about this post