Radio, online – Eleisaun jeral iha 2012. Partido politiku sira komesa halo konsolidasaun iha baze. Iha Distritu Ainaro, Sub-distritu Maubisse situasaun kontroladu wainhira partido tolu mak halo loron ida iha konsolidasaun partido politiku ba sira nia militantes.
Adjuntu Komandante sub Distritu Maubise Henrique de Araujo Carvalho haktuir ba jornalista iha salaun inkontru Igreja Maubisse Kuarta, (15/6) foin lalais ne’e.
Henrique konfesa katak, situasaun seguransa iha sub distritu Maubisse sei lao diak liu kompara ho tinan kotuk.
“Ba partido ne’ebe deit mak mai Maubisse ami prontu fo seguransa no ami sei nafatin kontrola situasaun iha 24 oras nia laran,”Henrique reforsa.
Durante ne’e partido mak halo konsolidasaun ba militantes hanesan partido FRETILIN, PD, KOTA, no CNRT. Ba oin partido sira mak registu ona iha Tribunal sei mai halo konsolidasaun iha Maubisse.
“Ami halo knar tuir lei no ordem, ne’e duni ami husu ba partido sira mos atu fo edukasaun ba nia militantes hodi kontrola hamutuk ba seguransa,”Adjuntu Komandante ne’e apela.
Iha fatin hanesan Administrador Sub-Distritu Maubisse, Claudino Ximenes apresia tebes ba ninia povu sira mak sai militantes ba partido oioin.
Ida ne’e mak demokrasia, maske iha partido ket-ketak maibe iha hanoin ida deit ba prosesu dezenvolvimentu nasaun ne’e nian no responsabilidade tomak ba stabilidade, espesial iha Maubisse.
“Ami iha ne’e fo livre tomak ba povu sira atu hili ba partido politiku tuir sira nia ididak nia hakarak,” Claudino akresenta.
Discussion about this post