Radio, online – Aviaun helikoptru Black Hawk husi Forsa Stabilidade Internasional (FSI) hatun Bomba gas iha foho Ramelau, iha Distritu Ainaro.
Husi hahalok laiha responsabilidade ne’e, estraga beleza (keindahan-red) foho lulik Ramelau, ai horis Iha area foho Ramelau hetan han hotu.
Lian hirak hato’o husi Deputadu Francisco de Araujo husi Bankada ASDT liu husi sesaun plenaria iha uma fukun Parlamentu Nasional Segunda, (20/6).
Deputadu nee hateten katak, aviaun black hawk ne’e hatun Bomba gas iha dia 15 fulan Junhu foin lalais ne’e.
“hau foti kestaun ne’e hodi husu ba estadu atu hare FSI nia knar. Tuir lolos situasaun seguransa diak ona, ita haruka sira fila ona. Mais laos estraga fali ita nia ambiente. Pior liutan ita nia foho lulik ne’e,”dehan Fransico ho tristi hahalok FSI nian ne’e.
Reprezentante povu iha uma fukun parlamentu ne’e husu ba Forsa Estabilidade Internasional tenki respite foho Ramelau tamba foho ramelau hanesan kultura nasaun Timor Leste nian.
Crispim da Silva hanesan joven senti tristi ho hahalok FSI nian ne’e. Maibe presiza buka tuir los k lae, FSI hatun bomba gas. Tuir Crispim see los duni estadu tenki foti medidas hasoru FSI.
“Sira mai ita mak bolu, see ita la presiza ona sira, bele fila ona,,”dehan Crispim ho lamenta. FSI nia prezensa iha Timor leste iha 2006 ne’ebe mosu krizi militar. FSI nia knar hodi estabiliza situasaun.
Discussion about this post