Radio, online – Instituisaun media, Timor Leste Media Development Centre (TLMDC) fo parabens ba strutura foun Radio Televizaun Timor Leste- Emprezariu Publiku (RTTL-EP) periodu 2011-2012.
Serimonia tomada de posse ne’e halao husi Prezidenti Komisaun Funsaun Publiku Liboriu Perreira no asiste husi Sekertario Estadu Konselho Ministru Agio Perreira iha, Otel Timor Sesta, (17/6).
Liu husi posse ne’e Prezidenti Interino Konsellu administrasaun ba RTTL-EP Expedito Diaz Ximenes nafatin asumi kargu ne’e, hanesan prosesu konfiansa husi governu hodi kontrola instituisaun estadu nian ne’e.
“Ita espera ho strutura foun ne’e bele hadia kualidade RTTL iha futuru, atu nune’e bele garantia povu Timor asesu diak liutan iha area informasaun ho diak liutan,”dehan Diretor Jeral TLMDC Francisco da Silva Gari ba radio liberdade online iha nia servisu fatin Sesta, (17/7) Kolmera, Dili.
Diretor ne’e hatutan, strutura foun ne’e hanesan ejijensia povu nia hodi hadia kualidade RTTL-EP ne’ebe durante ne’e ema barak kestiona konaba kualidade. Espera ba oin iha ekipa foun ne’e tau interses komun nia hodi hadia komunikasaun publiku ida ne’e. Diretor ne’e husu mos ba strutura halao knar tenki tuir visi no misaun RTT-EP nian.
Iha depois de Posse SECM Agio Perreira hatete, papel midia sai hanesan kinto (5) orgaun soberanu hodi kontrola sosial no defende prosesu demokrasia iha nasaun ida ne’e. Agio husu ba strutura foun ne’e atu jere funsoins komunikasaun estadu nian ne’e ho diak. Husu mos ba ekipa ne’e presiza tebes halao knar ho responsabilidade, imparsial no independente.
“Ita nia presiza informasaun hodi povu mos involve iha prosesu dezenvolvimentu nasaun ne’e nian. hau husu labele politiza RTTL-EP ba intereses individual no grupo no ekipa tenki servisu neutru,”Agio apela.
Iha fatin hanesan membru Parlamentu Nasional Manuel Tilman dehan durante ne’e ema barak lamenta tebes ekipa RTTL-EP sira nia servisu tanba ladun maximu fo informasaun ba povu. Tuir Tilman dala barak liu mak televizaun foka deit ba ema lider sira nunka fo sai realidade povu nia moris mak sei susar hela iha foho. Nune’e mos konaba notisias sei menus liu.
“Nudar Timor oan hau husu nafatin ba servisu nain iha midia estadu nian ne’e tenki defende ba povu sira mak sei terus no kiak. Midia mak sai matadalan ba mukit sira hodi hadia sira nia sofrementu,”Tilman espera.
Discussion about this post