Radio,online – Uniaun Eropeia nafatin komitmentu bo’ot ba prosesu dezenvolvimentu TL, liu husi loke vaga ba sosiedade sivil Internasional no Nasional hodi kompete ba projetu ne’ebe mak Uniaun Eropeia prepara ba tinan 2011. Objetivu husi vaga hirak ne’e hanesan meius importante hamenus no kombate pobreza.
Informasaun ne’e hato’o husi Embaixador Uniaun Eropeia ba Timor Leste Juan Carlos Rey-Salgado iha nia diskursu badak iha salao Memorial Hall, Sesta (27/8) foin lalais ne’e.
Iha okaziaun ne’e, Embaixador Uniaun Eropeia ne’e esklarese katak, Uniaun Eropeia iha relasaun no kooperasaun ne’ebe lao kleur ona ho organizasaun naun govermental no sosiedade sivil sira seluk nomos ho autoridades lokal no desentralizasaun sira iha baze dezenvolvimentu nian.
“Ami mos deklara katak liu husi vaga barak ne’e dalan hodi kombate pobreza no promove regra lei nian ne’ebe fiel ba liberdade fundamental tuir tratadu uniaun Eropeia nian,”dehan Salgado.
Salgado husu ba sosiedade sivil Internasional ne’ebe mak tama lista iha komisaun Eropeia nian no sosiedade sivil ne’ebe rejistu ona iha ONG Forum iha vontade hodi hatama proposta ne’ebe mak nakloke ne’e. projetu tomak sei halao iha 2011 nia laran, tanba prosesu atu hetan projetu hirak ne’e tenki priense rekeritus hotu tuir Uniaun Eropeia nia tratadu.
Projetu ne’ebe mak sei tuir tender mak iha area Diteitus humanus, Igualdade Jeneru, Diretur Labarik no ferik ho katuas sira, direitus aleizadus no ema minoria no sira seluk tan ne’ebe partesense ba kombate pobreza. Pedido tenki bazeia ba entre montante minimu no masimu hanesan, iha proposta minimu entre EUR 75.000 no masimu EUR 300.000.
“Orsamentu hirak ne’e sei la utiliza hodi sosa rai, kareta no sasan ho folin ne’ebe karun,”Salgado husu.
Iha fatin hanesan Diretora Organizasaun Rede Feto Yasinta Luzinha sente apresia tebes ba Uniaun Eropeia ne’ebe mak loke vaga barak hirak ne’e hanesan meius importante ba sosiedade sivil nasional hodi hola parte ba prosesu dezenvolvimentu nasaun ne’e nian nomos sai parseiru ba Uniaun Eropeia.
Diretora Rede Feto ne’e ho transparansia sei hatama ba vaga iha parte direitu igualdade jeneru nian hodi promove feto ho mane ba prosesu dezenvolvimentu tomak, tanba TL sei menus tebes feto nia partisipasaun.
“hau hamutuk ho sosiedade sivil nasional fo obrigado ba Uniaun Eropeia iha atensaun tebes ba iha igualdade jeneru hodi tau projetu ketak,”nia hatete ho hamnasa.
Iha sorumutu ne’e Sosiedade Sivil Internasional no Nasional iha antuasizmu tebes hodi rona esplikasaun membru Uniaun Eropeia nian konaba kriteirus ba prosesu tomak iha vaga ne’e.
Discussion about this post