Timor Newsline – Prokurador Jeral, Ana Pessoa hateten justisa lalika monu ba manobra ekonomiku no politiku, maibe prefere defende komunidade kbit laek sira.
Pessoa hato’o lia hirak ne’e iha serimonia tomada de pose ba juis, prokuradores no defensores hamutuk nain 14 iha sentru formasaun kaikoli dili segunda (16 / 05 / 2011).
Pessoa haforsa justisa nia papel importante tebes ba komunidade atu garantia lialos, Justisa no tau matan ba komunidade. “ita nia knar defende legalidade, ita hakruk deit ba lei. Ita lahakruk ba poder ekonomiku ka poder politiku, ita nia obrigasaun mak hakruk ba lei hakruk ba konstituisaun.” hateten Ana Pessoa.
Iha parte seluk Ministra da Justisa Dra. Lusia Lobato hateten terseiru kursu de formasaun ne’ebe ho durasaun tenpu tinan 2.6, formandu sira konsege remata ba seitor justisa hodi servi ba komunidade.
“ohin ita kontenti tanba bele fo tomada de pose no sai sasin ba sira nai saulu resin hat ne’ebe sai husi terseiru kursu formasaun bo seitor justisa” hateten lusia lobato.
Iha fatin hanesan Defensor Publiku Jeral Sr. Sergio Hornai hateten seitor Justisa importante teb-tebes atu bele lori justisa ne’ebe justu no solidaria ba Estadu de Direitu Demokratiku bele eziste no buras nafatin.
” tinan-tinan instituisaun iha seitor Justisa ninian liu husi Governo ka Estadu ida ne’e hakarak hametin dezenvolvimentu institusional atu nune’e instituisaun bele metin liu tan hodi bele presta servisu ne’ebe dignu, responsavel.” Hateten Sergio Hornai.
Iha parte seluk Manuel Expostu hanesan formandu hateten Defensor Publiku nia papel importante tebes iha sistema administrasaun justisa. Prezensa instituisaun Defensor Publiku atu garante prestasaun servisu gratuitu ba sidadaun sira.
“prezensa instituisaun ida ne’e atu garante prestasaun servisu gratuitu ba sidadaun sira ne’ebe laiha kbiit ekonomikamente atu selu buat sira ne’e,” dehan Exposto
Justisa hanesan seitor ida ne’ebe importante tebes atu defende komunidade no tau matan ba kumunidade hodi kaer metin lia los no Justisa iha Nasaun Direitu de Demokratiku. (Efrem Duarte Guterres)
Discussion about this post