Radio, online – Vise Prezidenti Parlamentu Nasional (PN) Maria Paixao ba jornalista Segunda, (14/5), iha situasaun eleisaun lejislativu besik ona, Deputadu iha uma fukun PN durante ne’e la halo diskusaun alias walk out lei tolu 3.
Lei tolu ne’e mak hanesan lei pensaun vitalisia ne’ebe halo ona revizaun presiza iha diskusaun, lei anti korupsaun ne’ebe finaliza ona no lei ba rai ne’ebe sei halo komfirmasaun.
“Ami tenki maioria absoluta hodi bele halo diskusaun konaba lei 3 ne’e, see ami nia kolega sira mak halo mamuk kadeira iha PN, lei tolu ne’e sei la halo diskusaun. Dala ruma lei 3 ne’e hein PN foun iha periodu 2012-2017,”Maria komenta.
Vise PN husi partido PSD ne’e antes atu halo diskusaun meja PN informa ba Deputadu hotu hotu , maibe Deputadu sira la mai. Tuir Mari agora dadaun Deputadu sira preokupa hela sira nia partidos ne’ebe atu tama ba prosesu kampana nia laran.
“Ami hein nafatin no aviza nafatin Deputadu sira kuando qorum too ona ami bele avansa ho lei rua ne’ebe iha, maibe iha bankada balun hateten katak, lei sira ne’e hela ba iha parlamentu foun. Meja la bele obriga Deputadu sira,”Maria hatutan.
Iha fatin hanesan Deputadu husi FRETILIN Francisco Branco hateten, lei pensau vitalisia nian Deputadu no lei anti korupsaun nian Deputadu FRETILIN iha 20 resin bele priense qorum ona, maibe kolia konaba lei rai nian Deputadu FRETILIN sei la marka prezensia. Lei rai ne’e desde uluk FRETILIN la konkorda. Lei ne’e la fo benefisiu ba povo ki’ik, i estado iha poder atu hasain rai husi povo atu halo dezenvolimentu i dezenvolimentu ne’e rasik mos la fo benefisiu ba povo.
“Ida ne’e laos interes politiku, maibe ami hare momos katak lei rai ne’e la fo benefisiu ba povo i lei ne’e mos fo poder tomak ba governo atu hasai povo husi nia hela fatin arbiru deit,”. Francisco komenta.
Entertantu Deputadu Bankada CNRT Arao Noe de Jesus husu ba meja atu hare ba lei ne’ebe mak importante hodi halo diskusaun, laos ne’ebe mak atu ba ema boot sira deit. tuir Deputadu ne’e, hanesan lei pensaun vitalisia. Lei ne’e favorese ba ema sira ne’ebe boot deit.
“Diak liu lei sira ne’ebe mak seidauk halo diskusaun rai hela no hein PN foun. Agora ita tenki prepara-an hodi hasoru eleisaun importante ne’e,”dehan Arao.
Discussion about this post