Radio, online – Arguida Lucia Maria Brandão Freitas Lobato hetan alegasaun tinan haat (4) ba toba iha komarka, tamba abuzu poder hanesan Ministra Justisa fo projetu ba nia laen no kompaina mak ligasaun hanesan familia la tuir lei tendernizasaun.
Prosesu julgamentu tama loron tolu, arguida hetan alegasaun tinan 1 to’o tinan 4 prizaun tuir kodigu prosesu penal artigu 297 abuzu poder no artigu 274 kona ba administrasaun damoza.
Iha julgamentu kinta horisehik, Kinta (26/4) Ministeriu Públiku kontinua husu klarifikasaun ba testamuña sira kona ba prosesu tomak hodi kompania Wesupa ne’e sai vensedór iha tenderizasaun ne’e. Tanba, tuir dadus MP hetan kompañia Wesupa ne’e la tuir tenderizasaun hamutuk ho kompañia 6 seluk, maibé ikus mai Wesupa mak sai vensedór.
Testamuña Ponciano da Crus nu’udar director administrasaun finansas iha ministeriu justisa deklara ba Tribunál katak nia laiha koñesimentu klean ba kazu ne’e tanba nia parte hatene to’o de’it prosesu CPV(surat perintah). Sertifikadór nu’udar testamuña, Jaime Maia iha MJ hateten, nia laiha koñesimentu ba kazu ne’e tanba la’os nia knaar.
Testamuña Helena Gomes, eis diretora prizaun Bekora hateten, nu’udar hala’o de’it desizaun saida mak superior sira foti ona liliu kona ba prosesu sosa farda ba guarda prizoneiru sira. Tanba ne’e to’o mandate remata, nia parte lahatene montante farda hira mak guarda prizoneiru sira simu. Nia dehan, farda ne’e rasik momentu entrega husi MJ simu direita husi parte lojístika.
“Ha’u lahatene farda ne’e to’o ka la to’o mais ha’u so simu de’it informasaun husi ha’u nia lojístika sira katak farda sira simu ona,” deklara nia.
Testamuña Joaquim dos Reis, funsionáriu departamentu aprovizionamentu iha MJ hateten, nia parte hatene asina dokumentu konkursu ne’e maibé la ho motivu ne’ebé klaru.
Iha julgamentu ne’e, Ministeriu Públiku ezije makaas ba juis sira atu aprezenta mós dokumentu balun iha ministeriu finansas hodi klarifika didiak, inklui husu mós ba eis director jornál Tempu seminal Jose Belo maibé parte defeza rezeita.
Julgamentu iha Tribunál Distritu Dili marka prezensa husi arguidu na’in rua Lucia Lobato no António Freitas nu’udar xefe aprovizionamentu.
Tuir planu, Tribunál sei bolu testamuña sira hamutuk na’in 25 hodi fo mos informasaun ba públiku, julgamentu ne’e sei kontinua ohin (sexta feira) iha dadersan.
Discussion about this post