Radio, online – Ministru Turismu Komersio Industria Gil Alves hateten, hodi rekonese durante ne’e sasan barak ne’ebe liu ona prazu sei fa’an iha loja sira, tanba seidauk iha polisia ekonomia nian hodi ba kontrola sasan hirak ne’e.
Ministru Gil kasu lia hirak ne’e iha Fundasaun Oriente wainhira partisipa iha debate nakloke ho jornalista ne’ebe organiza husi Centro Jornalista Investigativu Timor Leste (CJITL), Sesta (17/6) foin lalais ne’e.
Ministru husi partido ASDT ne’e hatutan, sasan ne’ebe prazu liu ona maibe fa’an nafatin iha loja sira tanba Timor Leste sedauk iha polisia ekonomia hodi kontrola.
“Ida ne’e mak sai difikuldade ami nian hodi kontrola sasan sira ne’ebe fa’an iha Timor laran tomak. Sasan prazu laos deit iha Dili laran, maibe iha Timor laran tomak,”dehan Gil hodi rekoinese.
Gil promete katak, ba oin MTCI sei kria lei espesifiku involve PNTL hodi kontrola sasan prazu ne’ebe sei halo moras povu ida ne’e. Gil dehan, ho lei sai baze legal hodi bele multa ba loja sira mak fa’an nafatin sasan liu tempo ona.
“Ita halo lei hodi proteze povu nia moris. Ita mos hare ba kompanha ne’e nia rendimentu wainhira ita atu halo multa. Kompanha mak hetan lukru maka’s fa’an sasan prazu sei multa maka’as,”Gil esklarese.
Liu husi oportunidade ne’e Gil husu ba jornalista timoroan hotu tenki servisu ho profesional hodi halao knar. Jornalista tenki independente, imparsial no ses husi politika.
Nune’e mos Gil husu ba aprende liu tan lingua Portugues, tanba Portugues nia versaun atu hanesan ho dalen Tetun, tanba ita nia dalen tetun ne’e la ses husi lingua Portugues.
“Hau enkoraza ida ne’e tanba tuir ita nia konstituisaun RDTL Portugues mos sai lingua ofisial,”dehan Gil hodi taka debate ne’e.
Discussion about this post