Radio, online – Prosesu pagamentu ba terseira idade tinan 60 ba leten ne’ebe halao iha Sub-Distritu Maubisse, Distritu Ainaro sei hamosu problema ba benefisiariu. Problema mak benefisiairu sira infrenta mak, benefisiairu ne’ebe simu tiha ona osan iha tinan kotuk maibe naran laiha.
“Hau nia povu sira mak direitu atu hetan osan subsidiu husi estadu maibe dala ruma la hetan. Katuas ho ferik sira simu tiha ona, maibe atu ba simu tinan ida ne’e naran laiha fali. Ida ne’e halo ami mos konfuzaun. Mais hau tenta ba MSS atu selu sira, tanba osan ne’e sira nia direitu,”dehan Administrador Sub Distritu Maubisse, Distritu Ainaro, Claudino Ximenes ba jornalista sira iha salaun ekontru Igreja Maubise, Kinta, (16/6/) foin lalais ne’e.
Administrador Sub-distritu Maubisse ne’e hatutan, liu husi IV governu konstitusional, AMP halo politika hodi fo subsidiu ba ferik katuas sira ho idade 60 ba leten. Durante ne’e ferik katuas sira simu osan dala 5 iha teritoriu tomak. Kada fulan ida hetan $ 35,00. Iha tinan 1 simu dala rua, fulan ne’en simu dala ida.
Claudio informa mos, durante ne’e mos ferik katuas sira mak simu subsidiu, balu naran lakon tanba fila hikas ba aman Maromak. Maibe mos balu avansa mai tan, tanba ferik katuas sira uluk iha idade 58-59 mos hakat mai iha tinan 60 ona.
“Ami benefisiairu sira muda total tanba razaun mak hau temi iha leten ne’e. hau seidauk bele serteza lolos ninia numeru, tanba ho problemas balu naran iha maibe naran lakon fali,” Claudio esplika.
Felisberta Araujo (62) hanesan benefisiaira hatete, konaba ninia naran la iha problemas. Avo ferik ne’e durante nunka falha simu osan subsidiu husi estadu liu husi programa ne’e.
“hau husu ba estadu tanba ita nia rendimentu mos sae, no sasan folin mos sae. Husu atu aumeta tan ami nia osan. Ami ne’e ninia goza ne’e tinan badak deit ona,’dehan benefisiaria ne’e ho hamnasa.
Discussion about this post