Radio, online – Sentru Advokasia vitimas Transporte no vendedores Merkado Taibesi iha krizi 2006, husu ba governu atu iha tempo badak nia laran atu fo kompensasaun ba sira.
“Ami nia problemas hanesan uma, sasan, transporte privado nomos sasan sira hetan sunu iha krizi 2006. Ami husu atu governu fo kompensasaun tamba ami vitima hanesan ho maluk sira seluk ne’ebe mak hetan kompensasaun husi governu,”dehan Porta voz Paulo Soares liu husi konferensia da empresa foin lalais ne’e.
Porta voz ne’e hatutan, relasiona ho problemas hirak ne’e dala barak ona hato’o ona pedido ba governu maibe to’o ohin loron governu la responde no resolve problema hirak ne’e.
Vitimas trasnporte no vendedores mercado Taibesi lamenta tebes ba Ministeriu Solidareidade Sosial (MSS) ne’ebe dehan vitima krizi 2006 rezolve hotu ona. Maibe realidade vitima sira seidauk hetan buat ruma husi estadu.
Manuel Marcal hanesan vitima ne’ebe ninia trasnporte publiku hetan sunu iha krizi dehan, “Ami ne’e laos refujiadu, maibe ami mos sai tamba husi krizi nia situasaun hau nia kareta ema sunu. Hau husu atu governu pelumenus fo kompensasaun mai hau,”nia komenta.
Vitima krizi ne’e ho lia ikus, see wainhira governu la responde sira nia problemas sei halo demostrasaun bo’ot hasoru governu tamba ida ne’e sira nia direitu nudar ema Timor ne’ebe tenki trata hanesan.
Discussion about this post