Radio, online – Lei garantia katak, kuandu sai ona membru polisia iha ne’ebe deit no kualker oras tenki funsiona nudar kontrola lei ho ordem. Hanesan membru Corpo Seguransa Pesoal (CSP) PM Xanana nian ho naran Mendes haksesuk malu ho porta voz SDSB nomos Pengecer fa’an SDSB la tuir standar folin ne’ebe regula.
Kronologi haksesuk malu ne’e mosu maizumenus tuku 90:30 otl, PM Xanana nia eskoltu ne’e hakat mai iha estrada ninin besik loja Lay nia sorin atu sosa SDSB. Tanba folin SDSB ne’e ho folin $1,50 halo Mendes hirus uitoan ba agen Mateus ne’ebe fa’an kupon ne’e.
Iha momentu ne’e Mendes esplika ba agen Mateus katak tuir lei ne’ebe publika ona iha jornal da republika katak kupon SDSB sei fa’an $ 1.00. Membru CSP ne’e husu SDSB tenki fa’an ho folin $1.00 tanba regula ona iha jornal da republika, husi Ministeiru Turismu Komersiu e Industria. “Imi fa’an lalika aumenta nia folin, fa’an tenki tuir lei. Tanba SDSB ne’e ema kiak sira mak sosa,’dehan membru CSP ne’e,”dehan Mendes ho hirus.
Tanba agen Mateus lakoi sai kulpa husi jogus legal ne’e, nia arame (telefone) ba Porta Voz SDSB husi kompanha Rudal 7984, Joao de Deus. Kuaze 15 minitus deit porta voz SDSB Joao de Deus Freitas to’o iha fatin hodi esplika ba membru CSP ne’e katak, fa’an ho folin $ 1,50 tanba seidauk iha lei ida maka regula SDSB nia folin. SDSB estadu legaliza tiha iha tinan kotuk.
Porta Voz hatete, fa’an ho folin $ 1,50 tanba atu hetan lukru. See fa’an ho folin mak termina ami sei la hetan buat ida. “Ita loke jogu ne’e tenki iha lukru,”dehan Joao de Deus.
Porta Voz ne’e husu ba membru CSP atu lalika ameasa iha publiku. Hakarak koalia konaba diak liu membru polisia ba iha SDSB nia sede hasoru malu dereitamente ho patraun. Depois rona esplikasaun ba malu entre membru CSP ho porta voz Joao de Deus ididak fila ba halo aktividades hanesan baibain.
Radio Liberdade online, tenta halo konfirmasaun konaba folin SDSB iha MTCI iha office staff mak iha. Liu husi staff ne’e husu hela nomeru telefone jornalista ne’e dehan orsida mak kontaktu. Maibe to’o notisias ne’e tun laiha kontaktu husi MTCI.
Discussion about this post