FM Preokupa Ba Kompaña Siguransa Privadu Iha Futuru

Radio, online – Mahein Nia Lian no. 27 halo diskute konaba lalaok Kompaña Siguransa Privadu no impaktu ba futuru oin mai.

Iha relatoriu ne’e Fundasaun Mahein (FM) mos preoukupa tebes konaba impaktu husi membru KSP lakon sira nia servisu wainhira misaun ONU remata iha tinan 2012. Tanba pesoal servisu iha KSP husi Kompaña sira hanesan Maubere Security, Gardamor, APAC, Gear Defence, Unipessoal Lda no High Risk Sicurity Group maioria servisu ka fo siguransa ba residensia privadu ema estranjeirus ne’ebe nudar funsionariu ONU iha Timor-Leste.

Kestaun ne’e hato’o husi FM liu husi komunikadu da emprensa (20/12) foin lalais ne’e. Fundasaun Mahein nia relatoriu ne’e mos fo analiza klean konaba impaktu negativu ba siguransa no stabilidade nasional iha futuru.

KSP nia servisu ka lala’ok ne’e iha relasaun ho siguransa maibe laiha kontrolu husi instituisaun kompetente governu nia hanesan Ministeriu Defeza no Siguransa, fo deit  autoriza estabelesimentu husi kompaña no presumidu atu superviziona sira nia atividade, maibé la iha regulamentu atu asegura kompaña siguransa privadu atu hala’o funsaun tuir orientasaun espesifiku. 

Nune’e mos relatoriu ne’e kestiaona konaba laiha planu husi governu atu antisipa impaktu husi dezempregu no resesaun ekonomia  husi membru KSP kuaze 3.000 sai husi serbisu wainhira misaun ONU remata iha tinan 2012. Tanba setor siguransa nu’udár empregadu bo’ot liu iha nasaun maibe wanhira  hirak ne’e sai ki’ik liu fali mak otomatikamente bele hamosu konflitu, tanba husi dezempregu mosu krime.

Relatoriu ne’e mos koalia konaba laiha monitorizasaun propriu husi ministeriu kompentente ne’ebé responsabiliza ba siguransa no falta koordenasaun efetivu atividade kompaña siguransa privadu bele kontra fali politika governu ne’ebé estabelese ona relasionadu ho siguransa.

FM mos preoukupa aspeitu importante tebes ida husi kompaña siguransa privada mak la iha lei ida ne’ebé regula ezistensia husi industria ida ne’e. Ne’e hatudu katak kooperasaun ho governu la’o bazeia ba vontade voluntariu hodi fo estadu fatin ki’ik atu kontrola kompaña industria importante hirak ne’e.

Bazeia ba preoukupasaun hirak iha leten maka Fundasaun Mahein hakarak hato’o rekomendasaun ba governu Timor Leste atu tetu no dezenhu.

1.    Rekomenda ba Komandante Jeral PNTL atu estabelese relasaun serbisu besik liu ho kompaña siguransa privadu.

2.    Rekomenda ba PNTL atu responde ba pedidu atu aprova dezeñu farda ne’ebé tuir kompaña siguransa privadu sira nia rekerimentu. Rekomenda ba governu atu estabelese eskritoriu rejistrador iha Sekretariu Estadu ba Siguransa atu regula no koordena atividade entre industria kompaña siguransa privadu no governu.

3.    Fundasaun Mahein sujere ba governu tenki hahu halo diskusaun agora atu hetan solusaun ba guarda siguransa privadu ne’ebé sei lakon serbisu, tanba pedidu ba sira nia serbisu sei tun kuandu misaun ONU nian remata, no mos tan kliente barak husi kompaña siguransa privadu sei husik Timor-Leste.

4.    Fundasaun Mahein mos rekomenda ba governu atu pasa lejizlasaun ne’ebé regula Regras Komprimisu ba guarda siguransa privadu. Infraestrutura importante barak iha nasaun ne’e hetan protesaun husi kompaña siguransa privadu no regras espesifiku ba defeza husi instalasaun hirak ne’e importante tebes ba dezenvolvimentu setor siguransa.