Radio, online – III Kongresu Nasional organizasaun libertasaun nasional, Dewan Solidaritas Mahasisa Pemuda Pelajar Timor Leste (DSMPPTL) ne’ebe ho tema “Re-konsolida movimentu dewan solidaritas liberta povu”.
III kongresu nasional organizasaun libertasaun nasional ne’e halao durante loron tolu, hahu Kurta, 14-16 Dezembru iha kampus tuan UNTL, Kaikoli, Dili.
Iha abertur, Eis Ko’ordenador Geral DSMPPTL Antero Bendito hateten, objetivu husi III kongresu atu lori dewan ho espiritu foun ho estudante foin sae sira ba involve iha prosesu dezenvolvimentu nasaun ho povu nian.
Antero hatutan, liu husi III kongresu ne’e atu kontinua movimentu solidaritas ba futuru. Nune’e mos liu husi dalan ne’e atu halibur malu membru antigo DSMPPTL ho estudante foun hodi difini planu politika interna ba kontribuisaun nasaun ne’e.
Eis Xefi DSMPPTL Distritu Kovalima Adriano do Nacimento, aktual Xefi Bankada PD iha Parlamentu Nasional hateten, maske DSMPPTL moris iha tempu badak, iha 1998 maibe ninia knar bo’ot tebes ba prosesu libertasaun nasional. Husi DSMPPTL nia mahon iha estudantes barak mos mate ba nasaun ne’e.
“Hau husu ba lideransa hotu atu fo atensaun maximu ba membru sira mak mate iha dewan nia mahon. Ita tenki ejiji ba komisaun homenajem atu fo konsederasaun ba vitima sira mak iha dewan tanba nasaun ne’e ninia independensia,”nia apela.
Adriano mos husu ba Xefi interior Antero wainhira iha organizasaun internasional mak mai atu esplora ideias involvimentu dewan nia iha prosesu luta, atu labele haluha xefi sira mak toma responsavel iha tempu neba.
Orador Prezidenti Komisuan Homejanem Virgilio Smith dehan, dewan solidaritas nia papel importantes no koresponde duni ba situasaun ida ne’ebe Timor oan tomak infrenta. Dewan mos sai mata dalan no fo korazen ba povu sira kaer metin ukun rasik an hodi hili CNRT iha referendum 1999.
“Hau koinese lider dewan sira, hau hatene sira brani duni hodi trasa planu hodi halo manifestu hamutuk ho joven sira,”Virgilio konfesa.
Virgilio dehan mos, estadu rekoinese organizasaun hot-hotu mak involve ba ukun-an nasaun ida ne’e. Agora dadaun estadu sei fo atensaun lai ba problemas veteranus sira nian, ne’ebe mak sei iha prosesu nia laran. Estadu nafatin tenta atu valoriza organizasaun no lideransa tomak ho membrus sira hotu mak involve-an.
Reforsa ba papel legal estadu nian liu husi Parlamentu Nasional, Prezidenti komisaun E, Ozorio Florindo dehan, lei inan ou Konstituisaun RDTL iha artigo 11 fo valor tebes ba ema sira mak mate ba ukun-an ne’e no organizasaun sira iha prosesu libertasaun ne’e.
“Ita nia estadu bele amandemen artigo sira konstitusau RDTL nia laran so uniku artigu 11 sei la bele bok. Tanba artigu ne’e prinsipiu fundamentais,”Ozorio esplika.
Iha III kongresu ne’e antes hahu fundador sira halo kritika ba komisaun organizadora tanba eis xefi DSMPPTL husi distritu lubuk la marka prezensa nomos estrutura tuan sira balun la partisipa. Maske iha kritikas, kongresu lao nafatin tuir ajenda.
Discussion about this post