Radio, online – Prezidenti Republika Jose Ramos Horta sei fo amnestia ba Diretor LABEH Christopher Henry Samson ne’ebe simu pena kadeia tinan 3 fulan 6 tanba halo falsifikasaun dokumentus hodi sai sidadaun Timor Leste.
Xefi estadu dehan, nia sei fo amnestia ba arguido Chris tanba durante tinan 10 hela iha TL, nia (Chris) seidauk komente krimi ida hodi estraga nasaun. Maibe fo nia kontribuisaun ba estadu liu husi luta kontra korupsaun.
“Kuitadu, hau hanoin diak liu fo deit amnestia ba ema oan ne’e. Sentesa halo tiha ona, maibe fo amnestia husik nia sai, husik ema ne’e hela iha ne’e,”dehan Premeadu Nobel da Paz 1996 ne’e.
PR Horta dehan amnestia sei la fo ameasa ba justisa, tanba justisa hatudu duni nia kbi’it halo investigasaun ba kazu ne’e.
PR Horta hatutan, desizaun tribunal ne’e tenki sukat buat hot-hotu hanesan kazu Chris nian. “Hau buka ajuda ema hot-hotu, entau hau ajuda nian, nusa mak la fo deit pasaporte ida ba nia,”Horta akresenta.
Tuir informasaun Chris ema Nigeria ne’ebe tinan 4 hela iha Malazya, depois hakat mai Indonezia. Iha Indonezia Chris mos bosok tun sae estadu ne’eba hodi dehan nia ema Papua. Agora dadaun Chris halo falsifikasaun dokumentus hodi atu sai sidadaun Timorenses.
Discussion about this post