Nakukun Falun Bernadino nia Matan, Kaben Linda Esforsu Mesak Sustenta Família

RALIBER (Lautém)- Senti lakon responsabildade hanesan aman ba família no oan sira no senti moris mos todan liu bainhira nakukun falun Bernadino nia matan rua.

Aman Sabino Bernadino husi suku Lore 1, Postu administrativu Loré, Munisípiu Lautem. Bainhira jornalista sira dadalia ho nia hamonu matan hodi espresa sai hisoria moruk ne’ebé nia hasoru iha nia moris.

Saida mak Bernadino dehan katak iha 2020 bainhira nia matan mean, hanesan moras bainbain ne’ebé sempre akontese, maibé realidade mosu oin seluk matan mean ne’e halo aman ne’e labele hare’e total to’o ikus sai defisiénsia matan.

Iha momentu ne’ebá família sira konsege lori Bernadino halo tratamentu iha Hospital Nasionál Guidu Valadares, (HNGV) iha tempu Pandemia, maibé novidades ne’ebé halo nia triste liu mak rona doutor dehan nia matan Urat mak mate ona labele kura.

“Ha’u nia matan ne’e laiha buat ruma kona nia mean de’it Iha tempu korona ne’eba ne’e ha’u nia matan hanesan ne’e ona, hau ba Dili konsulta iha ne’eba sira Doutor dehan urat matan nia mak mate entaun ha’u fila mai foho to’o agora hau nia matan rua la haree total” ho triste Bernadino ko’alia sai ba jornalista sira nia nia fatin Loré1.

Ho kondisaun ne’e Aman ne’e labele halo fali nia atividade hanesan uluk, nia tenki hela de’it iha uma laran tanba nia labele haree.

“Ha’u nia kondisaun hanesa ne’e hare’e hau nia oan sira ha’u hanoin, no ha’u so tanis de’it, ha’u labele halo buat ida” espresa ho matan be’en iha loron 31 fulan maiu 2024.

Enkuantu to’o ohin loron família sira seidauk kontinua buka dalan atu halo tratamentu ba Bernadino nia matan, no autoridade lokal sira halo ona surat kona ba nia maibé Aman ho kondisaun difiésiente ne’e seidauk hetan apoiu no direitu subsídiu difisiénsia nian husi governu.

Linda Esforsu Sustenta Família

Linda Ximenes hanesan kaben feto haree kondisaun Bernadino nian (Laen) halo nia tenki esforsu makaas servisu buka osan no aihan hodi responde ba nesesidade família nian.

Moris hanesan agrikultura loron loron Linda tenki ba toos foti nu’u maran no aihan hodi respondae ba família nia han hemu loron kalan no mos ajuda selu oan nia eskola.

Problema seluk ne’ebé Inan feton ne’e hateten mak sira labele asesu ba merkadu atu fan produtu ne’ebé sira produtu tanba kondisaun estrada halo sira tauk hodi lori folin ba merkadu.

“Ha’u nia ativiade mak faan nu’u, ba foti mai hamoos habain maran no faan husi nu’e ne’e maka hau selu oan sira nia eskola no nesesidade uma laran. Husi osan ne’ebé ha’u hetan fahe ba sira, karik la to’o sira buka rasik no ha’u ba to’os buka fali produtu seluk iha to’os hodi faan fali sei ida ne’e la to’o nafatin ne’e mak ha’u nia esforsu” konta Linda ximenes ho jornalista sira.

“Atividade seluk ne’ebé halo hodi ajuda hahan husi to’os maka nu’u maran, depois nu’u ne;e mos ami la lori ba merkadu tanba estrada la di’ak no ema mai hola de’it kilo ida 0.25 centavos (Kuarter)” Informa Inan Linda.

Maske ho osan ne’ebé ki’ik maibé Linda nafatin esforsu atu buka nu’u maran hodi faan tanba laiha alternativu seluk ba nia hodi, ida ne’e mak kbi’it no forsa husi inan feton ne’e oinsá mak família ne’e bele moris.

“Nu’u ne’e kuandu la foin ha’u pasensia de’it no senti triste tanba ida ne’e mak kondisaun moris ami nian, ami tau halo tan saida” Linda ko’alia no emosaun tristeza.

Husi Esforsu Linda no mos kondisaun Bernadino nian laiha kbi’it fiziku no finanseiru hodi kontinua apiou sira nia oan nia estudu nune’e oan sira deside hodi la kontinua eskola.

“Ha’u nia oan sira la eskola hotu, sira la kontinua eskola tanba osan laiha, entaun balun para iha ensinu sekundariu nain 4 no sira ba hela ho família sira iha Dili, depois sira tenpu iha maka mai fali haree ami”

Ho problema sira ne’e autoride lokal Xefi Aldeia Horolata Edmundo Sequeira hateten, nia sei esfoersu trata dokumentu família ne’e nian atu hetan tulun husi governu kona-ba tratamenetu no Apoiu ba Sabino Bernadino nia kondisaun rasik.

Total Ema ho Difisiensia iha Suku Loré 1 hamutuk 43 kompostu husi Difisiénsia Matan (5); Difisiénsia Tilun (8); Difisiénsia Fisíku (21); Difisiénsia Mental (9); ne’e total hotu husi Aldeia neen ne’ebé pertense ba suku Loré 1.

Informasaun ida ne’e jornalista sira hetan liu husi Atividade Media Tour ne’ebé realiza husi Asosiasaun Jornalista Timor-Leste kolabora ho OXFAM iha Timor-Leste no hetan fundus husi OXFAM iha Hongkong.

Jornalista : Natalino Ximenes