Filomena Soares hanesan defisiénsia fiziku ne’ebé durante ne’e hela de’it iha uma tanba hetan grave iha ain, la bele la’o mesak maibé presiza ajuda hiit husi nia kaben Roberto tanba kadeira roda laiha.
Feto defisénsia ho idade 51 ne’e konta tuir moras ne’ebé akontese iha tinan 1997 la’o sei di’ak, maibé liu tiha tinan ida iha momentu ne’eba Filomena ho nia kaben Roberto ba kuru bee iha mota nia hakfodak halo nia monu, tanba rona ema tiru kilat lian ho nune’e akontese kedas defisiénsia fiziku ne’ebé grave to’o ohin loron.
“Iha momentu neba krize hela entaun bee laiha atu tein, ha’u ho hau nia kaben ba kuru bee iha mota tanba ha’u hakfodak rona ema tiru kilat husi kafe laran entaun ha’u tauk no monu, husi ne’e ha’u moras komesa grave kedas iha tinan 1999 ha’u labele la’o ka han hemu mesak no dala ruma mós toba hader rasik labele tanba ha’u moras isin nakdedar, to’o ohin loron ha’u nia kaben mane mak sempre haree ha’u” Filomena haktuir ba ekipa jornalista sira halo media tour iha Aldeia Palimanu suku Fatuquero, Glenu Ermera,19/04/2024.
Roberto no Filomena forma familia la kous oan, tanba Filomena ho kondisaun fiziku difisinte grave, maibe Roberto nafatin akompanha no kuidadu nia kaben feto Filomena iha moris loroloron, durante tinan 25 ona.
Ha’u dehan ba ha’u nia laen katak hau moras no oan laiha hanesan ne’e “o sei hadomi ha’u ka,o hakarak atu hola fali feto seluk, maibé nia lakohi nia dehan mai ha’u katak nia nafatin hadomi to’o ha’u nia vida remata iha mundu ne’e, ha’u hare nia hanoin loos ha’u moras hanesan ne’e nia mesak halo serbisu to’os no uma laran depois tau matan mai ha’u” Filomena haktuir ho lian mamar.
Roberto de Deus konta tuir katak durante nia ferik oan hetan defisiénsia grave hanesan ne’e molok nia atu ba to’os nia tein kedas hahan, halo bee manas tau hela besik nia toba fatin hodi nia senti hamlaha nia esforsu aan hader neneik hodi obriga aan atu han.
“Ami rua harii familia ida kbiit laek tebes, ami oan laiha maibé ha’u nafatin hadomi maske nia kondisaun defisiénsia, ha’u mesak halo servisu iha to’os, tama mai uma nafatin tein, nono bee manas ba nia hariis fó han nia”Roberto haktuir.
Mane istimada ne’e hatutan dalaruma servisu mesak hanoin barak halo nia kolen ona ho moris ne’e, maibe nia hanoin katak uluk sira rua tuir malu to’o forma familia tanba domin, ho nune’e maske agora sente todan maibé Agardese no kontinua halao moris ne’e.
Iha fatin hanesan, Americo Soares nu’udar aman sarani Batizmu ba Filomena hatete sira sempre tau matan ba Filomena bainhira nia laen sai ba to’os, sosa aimoruk ruma ka fatin urjenti balun.
“Dalaruma nia laen ba tia to’os ha’u haruka oan sira ba halimar ho nia lori hahan tasak ruma ba fó nia han, karik nia presiza atu hader husi toba fatin ka atu ba haris fatin entaun labarik sira ajuda hi’it nia, se ha’u iha uma de’it la ba servisu, ha’u ba vizita nia” dehan Americo.
Iha observsaun jornalista sira nian hafoin halo media tour liuhusi programa Oxfam no AJTL, defisiénsia Filomena ho nia laen hela iha uma ho kondisaun dignu maibé uma ne’e hetan ajuda husi Grupu Klibur Juventude Tibar iha tinan 2023, uma ne’e sai mahon ba sira nain rua hodi hela no dada iis moris. Difisiénsia ne’e mós husu kadera roda tanba to’o ohin loron seidauk hetan kadera roda nia mos husu ba parte saúde no organizasaun defisiénsia sira atu halo mos vizita ba nia.
Hafoin halo entrevista jornalista sira mós halo asaun karidade ba Roberto no Filomena, asaun karidade ne’e tuir kbiit ne’ebé jornalista sira iha.
Jornalista : Natalina Araújo.
Editora: Eva Flor
Discussion about this post